十年生死兩茫茫，不思量，自難忘。十年前一場沙士瘟疫將二百九十九條寶貴生命斷送於死神手上，春去秋來盛暑隆冬，十年之後得到乜嘢教訓呢？唉，不思量，自難忘，最難忘嗰個叫做發瘟歌王周一嶽，當年佢出任食物及衞生局局長，任內搞到成個醫療系統亂七八糟，醫療失誤多到嚇死人，醫護人員又買少見少，疫症一旦再爆發都唔知點算好呀！
好衰唔衰喎，十年之後出現新沙士，殺傷力更大更驚人。新沙士最近喺沙特阿拉伯再殺一人，全球總感染個案增加至十五宗，當中死亡個案有九宗，死亡率高達六成。喺咁嘅情況之下，好難唔令人質疑香港嘅防疫戰線隨時失守啫。
「東方報業民意調查」顯示，三成七擔心新沙士隨時襲港；兩成六認為香港係高危地區；一成四憂慮病毒擴散一觸即發。
受訪者係咪杞人憂天呢？當然唔係啦，事關香港嘅公營醫療系統真係漏洞百出o架。○九至一二年間，公立醫院急症室人手流失率由百分之三激增至百分之五點九，家陣已有百幾個醫生空缺。重災區係沙田威爾斯親王醫院，流失率去到兩成咁交關。至於伊利沙伯醫院咯喎，由於醫護人手同樣告急，曾經有急症室病人要苦苦輪候八粒鐘先至見到醫生呀。
對於公立醫院人手短缺，三成五受訪者認為士氣低落導致逃亡潮惡化；兩成九覺得對醫生同病人都冇保障；兩成五擔心急症室亂龍，疫症可能有漏網之魚。
講來講去咪又係前朝政府種下嘅禍根囉，最大嗰個前特首曾蔭權不務正業，淨係貪威識食傍實富豪吃喝玩樂，貪腐醜聞至今都未查個水落石出，手下嗰個周一嶽亦係渾渾噩噩，令到醫療系統不勝壓力積勞成疾。上述民意調查結果亦顯示，對於公立醫院長期人手不足，大部分受訪者認為周一嶽要負上責任。四成九直斥問題係長期積累所致，難以短期內改善；兩成四批評周一嶽漠視問題，冇設法解決；一成四指摘佢係罪魁禍首。
所以話啫，現屆政府唔知黐咗邊一條筋，居然任命周一嶽做平等機會委員會主席，實在係不得人心嘅鹵莽行為。好似貪曾咁吖，政協都嫌佢名聲不佳而踢佢出局啦，點解現屆政府仲要搵一個聲名狼藉嘅周一嶽「廢官翻閹」呢？
講番新沙士蓄勢待發，四成七受訪者擔心重蹈覆轍；兩成一認為情況將會不堪設想；一成二預計公立醫院潰不成軍，根本難以打勝仗。
計功夫茶話齋，現任食衞局局長高永文確係要醒醒定定，切切實實為周一嶽收拾爛攤子，萬一新沙士殺人如麻，局長就會淪為千古罪人！