統計數據惹質疑 自我調查難置信

統計處冇耐之前被揭發造假醜聞，有外勤調查員踢爆，所謂統計好多時候係做數，原因之一係懶得就懶。譬如訪問劏房住戶咁吖，由於劏房只當作一個單位計算，而裏面塞滿好多住戶，必須逐戶逐戶調查，調查員為免事倍功半，索性裝聾扮啞過門而不入，導致統計數據有偏差。

面對「調查不盡不實」嘅指控，統計處煞有介事話要去「調查是否屬實」，結論係點呢？統計處成立統計數據質素檢定調查小組，尋日公布工作報告，小組抽取早前三項調查報告再調查，發現一致率超過九成咁話。統計處處長歐陽方麗麗表示，冇足夠證據證明有系統性捏造數據嘅情況，不過承認唔排除外勤員喺訪問過程之中未有依足指引，令回應出現偏差。歐陽方麗麗仲話，數據出現偏差有幾個可能性，例如受訪者記憶減退，回應者當時不在意提問等等，強調處方根據國際標準同慣例，統計處亦有機制檢視數據真確性，承諾未來會加強監管。

簡單咁講，統計處經過一輪自己友查自己友嘅程序之後，一口否定刻意捏造數據，只承認兩點，一係調查員失職，一係受訪者失憶。

唔知大家點睇，功夫茶就覺得，統計處「事後調查員工嘅調查報告」冇辦法構成足夠嘅可信度。喂，事後嘅調查員有冇失職呀？被查嘅受訪者有冇失憶呀？人哋質疑你嘅統計數據不可信，你就自吹自擂話數據冇捏造，咁嘅講法又係咪可信呀？

不如咁講啦，自己友查自己友始終係一面之詞，難以置信囉。打個譬喻吖，人哋質疑牧童大叫狼來了係講大話，牧童個老竇成立家族質素檢定調查小組，結論係冇足夠證據證明阿仔有系統性捏造狼來了，相信老竇一面之詞嗰個大概係智障嘅傻瓜。

咦咦咦，咪住先，財經事務及庫務局局長陳家強有個花名叫「傻強」，佢會唔會相信統計處嘅一面之詞呢？陳局長話喎，統計數據質素檢定調查小組已向佢呈交調查報告，政府會小心考慮小組嘅調查結果及建議，並督促統計處盡快落實建議，同時繼續推行早前公布嘅改善措施。陳家強又話，感謝調查小組不偏不倚作出分析同結論，就調查嘅三大範疇提出寶貴建議。

似乎，傻強真係信晒統計處嘅自我調查喎，家陣做大官原來冇必要太聰明。