中環出更：白韞六娶新抱開口恨抱孫
高官相繼娶新抱兼抱孫，前日輪到入境處處長白韞六。佢位會計師公子白振昌（Kenneth），迎娶鋼琴美人陳嘉雯（Karman），舉行「雙K甜蜜婚禮」，商界名流紛紛盛裝到賀，反而政界人士唔多，白處長夫婦笑到見牙唔見眼，仲開到口恨抱孫添。
多商界名人赴宴
白公子同太太係虔誠教徒，婚禮上周六中午喺鑽石山浸信會舉行，卓妮都有去睇吓，現場未見有高官到賀；原來白處長想低調啲，即使升呢做老爺，亦只請至親及教友觀禮。不過娶新抱咁大件事，擺酒慶祝唔少得，夜晚移師尖沙咀The Mira筵開三十六圍，名人空群出動，包括大新銀行主席王守業伉儷、開達集團董事長丁午壽、遠東發展副主席邱達昌伉儷、保良局總理陳細潔及家姐劉陳小寶、前東華主席馬清鏗、莎莎國際主席郭少明夫婦、唐英年媽媽唐尤淑圻等，大家咁畀面，白處長夫婦為招呼朋友應接不暇。
卓妮八到，白處長嘅頂頭上司、保安局局長李少光有事未能赴宴，但光哥個副局長黎棟國同常秘張琼瑤就有去飲。邱達昌表現興奮，梗係喇，下月輪到佢辦喜事，愛女補擺喜酒，前晚先來個預演。
白處長喺婚禮上不時望住一對新人甜笑，興奮如當年自己娶老婆，佢開口叫囝囝努力「造人」，話男孫女孫都唔拘。今年廿七歲嘅Kenneth同爸爸成個餅印，佢同新娘邂逅於八年前，當年鋼琴教師Karman跟表哥返教會，兩人相識後，愛火一發不可收拾。
先享受二人世界
新娘子宣讀誓詞時感動到口震震，嘉賓都為之動容。白公子心知爸爸恨抱孫，話享受一下二人世界後，就會積極考慮喎。
太太Karman非常喜歡小朋友，話希望子女係乖仔乖女，好似佢啲鋼琴學生咁喎。卓妮喺度祝福一對新人甜甜蜜蜜，二人世界變三人、四人、五人……世界，恭喜恭喜。
卓妮