肥而不鈍Big Baby實用

NBA今晨進行總決賽第六回合,塞爾特人目前能夠領先3比2,肥仔中鋒「Big Baby」格連戴維斯功不可沒,不過呢位大細路行為怪異,佢同學就爆料,話「Big Baby」讀書時會帶化妝品、唇膏返學,貪靚成咁,真係估佢唔到!

表情多多嘅格連戴維斯,係塞爾特人嘅開心果,佢感情豐富,易喊又易笑,試過有次操練,佢畀老將加納特鬧完後,即刻以淚洗面,不過最估唔到係佢有鋪化妝癮,真係好難想像一個大肥仔,化咗妝之後會變成點!

塞軍今晨又靠佢

「Big Baby」鍾意化妝,未必係因為佢鍾意扮女人,而係佢平時古靈精怪,乜都鍾意玩一大餐,據講佢試過有次去街買手提電話,為咗唔想人認得,所以特登戴上面具,咁標奇立異,想人哋唔認得你都唔得啦!

呢位超級大肥仔最大嗜好當然係食嘢啦,佢最愛嘅食物係雞肉三文治、朱古力餅同海鮮,佢成日都會同女友Jenna Gomez去食海鮮餐,蝦同蟹腳都係佢嘅至愛,雖然球隊嘅體能教練曾多次禁止佢亂咁食嘢,不過格連戴維斯一於好少理,好彩佢喺季後賽一直表現出色,而且肥得嚟相當靈活,故球隊先至網開一面。湖人中鋒拜林近期受傷患困擾影響表現,「Big Baby」,塞軍今場又靠晒你喇!(無綫明珠台、有線165台及now 670周三早上9時直播)

■本報綜合報道