騎士贏溜馬中部區稱霸

正全力衞冕常規賽冠軍嘅騎士，尋日遇上有主將格蘭加缺陣嘅溜馬。由於溜馬實力參差，故騎士三節過後已領先16分，雖然第四節稍為放鬆下被溜馬追貼分數，但騎士最終贏99比94。「大帝」勒邦占士繼續勇銳，獨取29分，並搶得9個籃板球及9次助攻。計埋今次，占士職業生涯已造出49次單場得分「30+」、籃板球及助攻「8+」嘅成績，超越魔術手莊遜嘅48次，而「波神」米高佐敦就累積51次。

佐敦做山貓老闆

騎士贏波後總成績為54勝15負，正式確保成為中部區冠軍，今次亦係騎士史上第三次獲得分區冠軍。

另外，NBA宣布米高佐敦收購山貓已獲董事會通過，「波神」正式成為山貓班主。佐敦今次亦成為NBA史上，首位職業球員出身嘅大股東及第二位黑人班主。

本報綜合報道