綠軍狂數騎士領先3:2

勒邦占士昨日打出近年最差一仗，全場14投僅3中，無甚表現之下僅得15分，令騎士錄得季後賽主場史上最大敗仗。賽後占士獨力承擔責任，認為騎士面臨出局係佢一手做成：「我喺近幾場波都搵唔到手感，係落後2比3嘅主要原因。」

明早嘅第6回合賽事喺波士頓進行，塞爾特人只要贏波就晉級，所以季尾就同騎士約滿嘅占士，尋日好可能係最後一次喺騎士主場比賽。唔知係咪呢個原因，占士喺完場前3分58秒被調離場時，同騎士一眾教練及奧尼爾擊掌，極具投降告別意味。

調走擊掌告別味濃

其實又難怪占士會提早投降，皆因塞爾特人踏入季後賽表現脫胎換骨，好似尋日咁，「三巨頭」皮雅斯、加納特同雷阿倫合力轟入64分，加上朗度喺下半場狂取16分，實在無懈可擊。睇嚟聽日騎士作客要靠占士發揮小宇宙，才可扭轉劣勢。