樓價狂飆，幾達失控，政府被轟無力助小市民置業安居，為息民怨民憤民怒，終一次過推售所有剩餘居屋及夾屋，合共四千四百四十七個單位。政府一鋪晒冷，是否有助遏止樓市升風？
不同階層的人有不同的聲音。有大地產商認為可為熾熱的樓價止吓咳，不過就唔好起居屋喇！老朽則以為政府趁市旺，壓咗十多年的貨尾，如今平均呎價三千至三千七百元，一個近市區嘅細單位都要二百六十多萬元，恐非「八十後」打一份八千元的工能負擔「供樓」（即使父母代供首期）。你話喇，政府一招了斷，既贏得救近火的美譽，散埋貨尾又為庫房添一大筆收入，何樂而不為？
豪宅天價，鬍鬚曾穩定樓市四招軟而無力，業界多認為又係虛晃的花招，連老鼠都嚇唔走，何況屢得大蛋糕嘅大鱷？吃少兩粒餅碎，幾咁閒！樓價上升，主要是因為熱錢湧入加上低息環境，有錢唔買樓保值就笨咯！大家睇吓高官，有幾多人冇幾層豪宅揸手兼出租？
據房委會二○○九年有關公屋輪候冊的統計資料，○八至○九年度共有十一萬四千個仍然在案的申請，較○三至○四年度的九萬一千個仍然在案的申請，多出近二萬個個案。可見申請公屋的市民有增無減，今趟一招了推售夾屋居屋，居民買了居屋，政府收回其公屋，是否就能做到「一個單位，兩個家庭受用」？若然，那自然值得慶幸，少了「白了少年頭」依然上唔到公屋的「空悲切」！若不然，一招了好心做壞事——掀居屋炒風，那政府就是搬石頭砸自己的腳。