中央領導人明示香港有五大深層次矛盾，以煲呔曾日日諗退休嘅心態，恐怕如五雷轟頂，生命中不能承受的重！暮春三月，禮賓府嫣紅淡紫的杜鵑開透，想起領導人提醒的「行百里者半九十」，這句出自《戰國策》的詩句，說甚麼行一百里，雖已行了九十里，亦只能當完成一半。嘩！名副其實嘅「歲月神偷」，餘下嘅日子好難捱啫！煲呔曾此刻，想必祈禱歲月真係可以被「神偷」！
回歸以來，香港一事無成，「六大優勢產業」——教育、醫療、環保、創新科技、文化及創意、檢測及認證，有邊瓣產業抽芽？好似醫療，最叻就係預留土地，大佬啊！公立醫院日日醫療失誤，從來無大病痛嘅，一步入嗰間叫屯門嘅「醫院」，分分鐘就此長休！唔該搞好啲行政，唔好肥上瘦下、留住啲好醫生好護士啦！咁頻密嘅醫療失誤，老朽只望夢想成真：做隻貓做隻狗不做病人！煲呔曾，用啲地嚟起骨灰龕先啦，要解決深層次矛盾，首先就係要務實。
內地要告別「口號治國」這種空洞的形式主義，也是要務實。老朽記得，當年鄉村的牆上，常刷上的宣傳口號如「再窮不能窮教育，再苦不能苦孩子」，後來在農村普及九年制義務教育，縣鄉財政拿不出錢來建學校，要農民集資，這口號的潛台詞是要動員農民捐款集資，衰極都叫有啲嘢做吓，香港式吹水，比口號更浮誇。
政府在經濟、政治和民生上有五點深層次矛盾未解決，煲呔曾，你養好精力發功未？振作點，領導人要你交功課，逼到埋牆，好歹求六十分，不要淪為卡在鐵枝罅的野豬！