中環出更：呂鈞堯娶韓籍靚老婆
擁有一副baby face嘅保良局主席呂鈞堯（Quincy），戀情一直收得好密實，背後有個好靚嘅韓籍女朋友Miyoung，兩人尋日終於拉埋天窗，下午喺跑馬地聖瑪加利教堂舉行婚禮，夜晚再喺灣仔會展筵開六十席，政商界名人畀面到賀。保良局一班副主席同總理撐場之餘，仲打咗一對夫婦造型嘅黃金公仔送畀Quincy，希望佢同太太白頭偕老。
中學認識 青梅竹馬
卓妮尋日中午喺教堂見到Quincy，心諗呢個世上又少個單身靚仔。唔講唔知，Quincy喺中學讀國際學校時已認識Miyoung，稱得上係青梅竹馬，Quincy嘅爸爸呂錦泰及媽咪呂陳慧貞更對Miyoung呢個新抱畀足一百分。Miyoung喺香港畢業後曾經返韓國工作，後來才回流香港；雖然兩人曾經分隔兩地，但感情保持得好好，直到今年二月先決定結婚。
Quincy話，婚禮前都擔心自己會好緊張，但臨場見到咁多香港同外地嘅朋友嚟撐場，心情輕鬆好多，反而Miyoung就話有少少緊張，但緊張得嚟好開心喎！到教堂見證新人嘅嘉賓有好多，卓妮就見到久違了嘅前房屋局局長黃星華夫婦、賭王何鴻燊女兒何超鳳及夫婿、蕭明家族後人蕭志成等。
會展結婚晚宴仲旺場，前馬會主席陳祖澤夫婦、教育局局長孫明揚夫婦、玩具大王蔡志明夫婦、金城營造主席王國強、行政會議成員梁智鴻、廉政專員湯顯明等。Quincy嘅保良局一班兄弟都有撐場，包括副主席鄭錦鐘（Eric）、總理黃英鵬（Simy）等，佢哋齊齊夾份打造一對夫婦造型嘅黃金公仔，希望Quincy夫婦白頭偕老，長長久久，認真有心思！
卓妮