尋日係立春，根據傳統，即係新一年嘅開始，象徵冬去春來，萬象更新。但可惜吖，本港嘅政治氣候並無改善，一樣係吵吵鬧鬧，家無寧日。
呢，淨係簡稱TSA嘅全港性系統評估咋，已經拗餐飽，搞到滿城風雨。經過兩個月討論，檢討委員會終於公布首份報告，提出多項改善建議，包括今年只邀請全港一成即約五十間學校應考，其餘九成小學可獲豁免，即係話，制度基本上名存實亡，港府又一次跪低。仲有吖，新版TSA中、英、數科嘅試題亦會修訂，除咗減少題目數量，仲會避免用艱深字眼，學生就算被抽中應考，難度亦大大降低。
不過咁，你有你跪低，佢有佢反對到底，好多家長依然唔肯收貨。佢哋話喎，一直以來嘅訴求係取消整個評估制度，而非微調方案，擔心今年變相煞停，明年一樣可以捲土重來。有家長仲揚言，如果當局一意孤行，學校繼續操練，就會為小朋友請假拒考添。你話嘞，咁樣拗落去，幾時至可以收科呢？
即係咁，當局借檢討委員會之手，將系統評估剝皮拆骨，已經係一次大讓步，但如果家長仍然唔肯收貨，都係嘥氣嘅啫。冇錯，定期為學生做進度評估，以便因材施教，本來無可厚非，外國亦相當普遍，問題係，人哋做得到，香港未必做得到，今時今日乜都政治化，TSA好明顯已經淪為政治戰場，無論點樣修訂再修訂，讓步再讓步，都唔會消除反對聲音。多一事不如少一事，港府弱勢無能，動輒得咎，與其遲早都要面對現實，不如早啲跪低好過，反正早就跪慣嘅喇，係咪？
所以話，弱勢政府百事哀，連系統評估咁小事都搞到滿城風雨，呢個政府仲可以做乜吖。香港係多元社會，每一項政策都有人支持，有人反對，本來好正常，弊在官僚無能，化解唔到分歧，反而一遇反對聲音就跪低，講起都可悲。唔怪得尋日立法會審議版權修訂條例又流會喇，今次已經係兩個月內第四次，睇嚟都係凶多吉少，難為當局仲堅持唔撤回草案，盞唔衰攞嚟衰嘅咋。
講到底，天下本無事，庸官自擾之。全港性系統評估又好，版權修訂條例都好，本來都係冇乜爭議嘅議題，點知落到港產官僚手上就變成政治炸彈，都唔知好笑定好嬲。冇計喇，港府無能，政客無良，成個社會好似撞咗邪咁，吵鬧不休，內鬥內耗，都唔知幾時至可以走出困局。立春係新一年嘅開始，立法會居然以流會贈興，睇怕未來一年都幾難有平靜日子，大家最好自求多福！