「世界真細小小小，小得真奇妙妙妙」，呢首改編自英文歌嘅《世界真細小》，被用作香港迪士尼樂園其中一首主題曲，大家早就耳熟能詳。可惜吖，細小未必奇妙，尤其係面對上海迪士尼樂園嘅競爭，香港唔止不妙，簡直雪上加霜。
嗱，上海迪士尼樂園宣布今年六月十六日正式開幕，呢個被譽為中國最大規模嘅中外合作旅遊項目，擁有多項世界第一，開幕初期就有六大主題園區，仲有世界最大嘅迪士尼城堡、全球首個以海盜為主題嘅園區、世界最長嘅迪士尼花車巡遊路線；另有兩座主題酒店、購物餐飲娛樂區「迪士尼小鎮」以及星願公園，淨係星願公園就佔地四十公頃，相當於五十六個標準足球場，都咪話唔誇張。
唔使問阿貴，又新又大嘅上海迪士尼開門迎客，一定會搶走唔少訪港旅客。內地專家預測，樂園每年可吸引數千萬名旅客，帶來近九百億元消費額。有內地網民已經講到明，終於唔使再去香港迪士尼咯。
本來呢，以中國地方咁大，人口咁多，容納兩個迪士尼樂園完全冇問題，弊在香港自己唔生性，一味食老本，加上激進組織成日搞搞震，將內地客視為蝗蟲，人哋有得選擇，又點會再嚟香港受侮辱吖。業界人士認為上海迪士尼會搶去長三角嘅旅客，其實計功夫茶話齋，如果香港繼續不思進取，點止失去長三角旅客咁簡單。
唔係講笑o架，除咗上海迪士尼來勢洶洶，周邊地區如日本、新加坡及馬來西亞亦有新旅遊項目落成，加上港元跟隨美元強勢，進一步削弱香港旅遊競爭力，前景可以講係一片暗淡。呢，啱啱過去嘅一年，整體訪港旅客錄得十幾年來首次下跌，其中內地旅客跌幅最明顯，呢啲就係一個明顯嘅警號。最怕低處未算低，隨着旅客持續減少，真正嘅寒冬可能仲喺後面。零售業界預料農曆新年後可能出現結業及裁員潮，絕對唔係杞人憂天。
正所謂，窮則變，變則通。上海迪士尼樂園殺到埋身，香港旅遊業危機重重，港府究竟點樣應變呢？講起真係令人難以置信，新一份施政報告一味誇誇其談，所謂參與一帶一路戰略、全力發展創新科技等等，吹到天花龍鳳，但對旅遊業目前嘅困境就輕輕帶過，淨係提出擺放三十幾個本地動漫人物大型公仔及場景喺金紫荊廣場喎，簡直九唔搭八。
逆水行舟，不進則退，香港迪士尼樂園係亞洲第二個，「小得真奇妙妙妙」，但隨着上海迪士尼即將開幕，香港再冇呢支歌唱咯。人哋後來居上，我哋原地踏步，呢個咪就係龜兔賽跑現實版囉！