一件污，兩件穢，三件無所謂。立法會烏煙瘴氣，七國咁亂，反對派政客為反而反，拉布成災，搞到審議版權修訂條例三度流會，而近二百億元嘅高鐵工程追加撥款更只能望天打卦，唔知幾時至可以表決。正如「東方報業民意調查」顯示，大多數受訪者認為反對派不顧後果，一拖再拖，唔止造價愈來愈高，而且隨時爛尾收場，成為一場災難。
市民嘅擔心唔係冇理由(口架)，高鐵工程問題多多，一波多折，都唔知點樣收科。當局話喎，如果高鐵追加撥款無法喺下月底前通過，就要被迫暫時停工，期間每月開支仍要二億三千多萬元，六個月計即係要十四億元，如果工程爛尾，港府仲要分別額外支付約三十四億元及一百零六億元，統統由納稅人埋單，都咪話唔大鑊。
正如多數受訪者話齋，雖然高鐵工程目前陷於騎虎難下嘅局面，但無論如何都應該盡快完成餘下工程，否則已經投入嘅六百五十億元固然付之流水，仲要攞百幾億元出來善後，而且錯過未來嘅經濟效益，簡直係香港嘅超級災難。
嗱，條數就係咁計喇，可惜反對派唯恐天下不亂，根本唔會關心呢啲。大家有眼見，立法會淪為「垃圾會」，政客有破壞冇建設，一味阻頭阻勢，唔係拉布就係流會，好似嫌香港唔夠亂咁。加上今年係立法會選舉年，政客為爭取選票，仲唔做戲做到足咩。所以話，高鐵追加撥款想如期通過，睇怕仲難過登天，何況仲有「一地兩檢」問題未解決，更加添煩添亂。
講起真係失禮，高鐵香港段仲喺度望天打卦，反觀內地段早就通車，連深圳福田站亦已正式啟用，一河之隔有如天淵之別，香港人有乜法子唔閉翳吖。當然喇，近年大型基建無一不延誤，無一不超支，政客搞風搞雨固然係主要原因，港府無能同樣難辭其咎。正如上述調查顯示，大多數受訪者認為政府無積極管理工程進度，而立法會拉布亦令基建延誤成為常態；受訪者更認為，多項基建工程撥款及法例遭議員拉布阻撓，唔止影響港府施政，亦阻礙香港發展，更加拖累民生。
冇錯嘞，近年香港唔知行咗乜衰運，頭頭碰着黑，港府管治已經無能，加上政客興風作浪，搞到家嘈屋閉，永無寧日，唔怪得香港不斷沉淪喇。高官就鬧得啱嘞，立法會議員每月人工九萬幾，而且有十幾萬津貼，四年任期完結仲可以領取六十萬元約滿酬金，薪酬高福利好，但就不務正業，一味拉布流會，阻頭阻勢，簡直豈有此理。唔通香港真係氣數已盡？