古人話：「大者不能，小者不為，是棄國捐身之道也。」港府就係典型例子喇，大事如高鐵同港珠澳大橋固然烏龍百出，搞到嚴重延誤同超支，小事如改善地區行人設施一樣拖拖拉拉，遙遙無期，官僚無能，想唔棄國捐身都唔得喇。
係咁嘅，前特首曾蔭權爵士喺○八年施政報告提出「行人環境改善計劃」，話要喺旺角、銅鑼灣、元朗等繁忙地區加建行人過路設施喎。計劃本來無可厚非，弊在八年過去喇，仲係只聞樓梯響，落實無期。好似旺角興建行人天橋接駁街市一帶天橋系統咁，當局延遲到一三年至進行勘察，到依家仲未動工；又好似元朗明渠興建行人天橋咁，雖然○九年已經展開公眾諮詢，但拖延逾五年至完成可行性研究，就算方案最終獲通過，都要二○二三年至能夠落成；至於銅鑼灣通往跑馬地嘅地下行人隧道計劃仲離譜，連動工及完工日期都未有，問你服未。
當年港英政府打造玫瑰園計劃，新機場連同青馬大橋、西隧等十項核心工程，規模宏大，都只係用咗九年時間，家陣港府興建幾條行人天橋及隧道啫，講咗八年都未開工，講都冇人信。高鐵同港珠澳大橋進度緩慢，就話因為受到反對派阻撓啫，行人環境改善計劃牛步蝸行，又點樣解釋吖？唔使問阿貴，港產官僚梗係認為呢啲只係小事，冇乜人關注，所以咪懶懶閒囉。民生無小事喎，吹水就得！
其實，改善行人環境絕對唔係小事(口架)。係人都知，旺角、銅鑼灣同元朗等旺區車水馬龍，人流如潮，行人路經常逼爆，搞到人車爭路，險象環生。以重災區旺角亞皆老街為例，過去三年就發生十七宗涉及行人過馬路嘅交通意外，舊年有位九旬老婦仲命喪輪下添。港產官僚得過且過，改善行人設施慢過龜爬，你話係咪靠害吖。
見微知著，行人環境改善計劃拖拖拉拉，其實就係港府胡混度日嘅縮影。大型基建延誤超支，發展經濟束手無策，搞到香港競爭力跌跌不休，乜都落後過人。以前「香港速度」係高效率嘅代名詞，今日變成蹉跎歲月嘅寫照，講起都可悲。當然喇，市民早就慣晒咯，尤其係前朝曾蔭權政府，施政唔係虎頭蛇尾，就係雷大雨小，結果一事無成。現屆政府曾規梁隨，今年施政報告重提改善行人設施，睇怕又係大隻講，隨時拖多八年都未有下文。
咪話功夫茶唔提醒，當局如果想改善行人設施，就唔好再拖拖拉拉嘞，萬一連起天橋及隧道都延誤及超支，咁就真係國際笑話喇。