立法會又流會？係吖，又流會吖，而且已經唔知係第幾個「又」咯。唔怪得有人話，今時今日嘅立法會係如假包換嘅垃圾會，議員嘅工作唔係開會，而係製造流會！
係咁嘅，立法會尋日繼續審議版權修訂條例，一開波反對派就不斷要求點人數拉布，初時建制派仲勉強頂得住，但到第八次點人數終於失守，最後以流會收場，今次已經係兩個月內第三次，問你服未。
一如既往，建制派及反對派議員事後例牌互相指摘，互相卸責，其實，五十步笑一百步，大家都無謂再嘈咯。尤其係反對派，成日話為民請命，阻撓惡法，講到冠冕堂皇，實際上係政治掛帥，為反對而反對，為拉布而拉布。
即係咁，立法會流會成為家常便飯，市民早就麻木晒，以前或者會口誅筆伐，今日只能搖頭嘆息。當然，麻木還麻木，立法會慣性流會始終唔係辦法（口架），議員嘅職責包括審議法案及撥款，如果郁下就拉布，郁下就流會，唔止議會空轉，施政癱瘓，成個香港都遲早被玩死嘅咋。
歸根究柢，拉布及流會無日無之，正正係行政立法惡鬥嘅結果，講得好聽啲叫內鬥內耗，講得唔好聽就係攬住一齊死。立法會空轉，政客人工照（扌豆），港產官僚亦冇乜損失，難為納稅人除咗要負責埋單，仲要承受經濟民生停滯不前嘅苦果，講起都幾無奈。行政立法惡鬥不休，陷入死局，就好似一個重症病人咁，已經無藥可救，只能夠眼白白等死，你話係咪可悲吖。
最好笑嘅係，拉布政客仲喺度狡辯，話萬物有源有起，冇版權修訂條例就唔會出現流會喎。其實，反對派不擇手段阻撓施政，就算冇版權修訂條例，其他議題咪一樣拉布。
唔係誇張（口架），立法會被騎劫，施政寸步難行，版權修訂條例受阻仲係小事，其他重要經濟民生項目受阻至係大件事吖。呢，財委會正審議港珠澳大橋及高鐵工程追加撥款，喺反對派嘅瘋狂拉布之下，進度慢過龜爬，如果無法如期通過撥款，兩個項目隨時爛尾，超級工程淪為超級災難，香港想唔沉淪都幾難吖。
所以話，哀莫大於心死，政客唯恐天下不亂，講多都嘥氣。不如咁喇，潮流興衡工量值，既然議事規則無法阻止政客拉布流會，以後一於同薪酬掛鈎，每流會一次，議員減薪三成，咁佢哋就未必敢再搞搞震嘞，係咪！