俗語話「貼錢買難受」，用嚟嘲諷有啲蠢人花錢反而招來麻煩。你可能會覺得呢句說話得啖笑，不過咁，原來現實中真係有人咁笨（口架），邊個？咪就係出晒名大花筒嘅民航處囉。
呢，話說《東方日報》及《太陽報》率先獨家踢爆民航處豪花十五億元購買新空管系統，拖足咁多年，一直問題多多，即使最近進入測試亦甩甩漏漏，故障頻生，到依家仍然睇得唔用得，大拿拿十幾億買嚟做擺設，呢啲咪叫做霸氣囉。
好嘞，新空管系統一拖再拖，終於半年後準備啟用嘞，民航處亦話滿意測試結果。你以為好事多磨，終於搞掂喇，點不知更大鑊仲係後頭，消息人士再向本集團揭露新系統仲有唔少重大瑕疵，好似雷達顯示屏幕咁吖，新系統唔止冇同步更新功能，顯示屏仲出現航機距離「時近時遠」嘅情況，簡直係半盲兼大近視，你話嘞，空管人員無法及時識別安全距離，航機隨時炒埋一碟有之，問你怕未。
咁都未夠恐怖呀，新系統顯示航機位置嘅更新頻率同樣騎呢，舊系統每三秒便更新一次，新系統居然每四秒至更新，新不如舊，你話幾咁荒謬吖。航空安全爭分奪秒，一旦遇上緊急情況，如果空管人員唔能夠喺最快時間作出反應，咁就大件事啦。
最弊係民航處仲死撐，話航機位置更新頻率係參考咗新加坡、澳洲等主要空管中心以四或五秒為準嘅做法，奇就奇在，如果呢套新系統咁巴閉，因乜解究全球只得三個地方用緊呢？甚至連印度機場都彈到九彩，準備打退堂鼓呢？
正如前民航處處長林光宇話齋，安全底線絕不能妥協，唔通咁簡單嘅道理民航官僚唔知咩。其實，民航處管理層唔係唔知，而係知而不理，根本拿航空安全較飛。有參與測試嘅人員曾多番反映呢套系統非常唔掂，點不知高層闊佬懶理，一意孤行趕喺處長羅崇文退休前啟用，為咗滿足一己風光而置人命安全於不顧，仲有冇過分啲吖！
講開羅崇文處長，大家應該都唔陌生（口架）嘞。事關喺佢管治下，民航處嘅醜聞多多，最經典莫過於佢將民航處新大樓改建成豪華娛樂城畀自己及太太享用，搞到天怒人怨，連審計署都狂數「十宗罪」，立法會帳委會更加用「強烈譴責」勁插。不過羅崇文一於好官我自為之，印印腳等退休收工，你又吹得佢脹咩？
冇符喇，香港近年唔知撞咗乜嘢邪，事事不順，頭頭碰着黑，連一向引以為傲嘅航空樞紐地位亦不保。新空管系統問題百出，正正係港府管治千瘡百孔嘅象徵！