近年興起一個詞語叫「平行空間」，即係指宇宙同時存在不同時空但又唔會交匯。咪以為講緊科幻小說吖，港府部門各自為政，各行其是，咪就係兩個完全不同嘅世界囉。
唔信？聽吓最新一份申訴專員公署調查報告點講喇。話說環保署○四年推出新措施管制車輛廢氣排放，如果車輛被遙距測試儀器檢測到廢氣超標，就要喺十二個工作天內接受俗稱「跑步機」嘅氮氧化物測試。本來呢，當局加強打擊「墨魚」車輛無可厚非，問題係環保署同運輸署完全冇協調，運輸署嘅汽車年檢至今冇包括氮氧測試，就算汽車通過運輸署年檢，亦唔一定可以通過環保署跑步機測試，搞到市民無所適從。
港產官僚各自為政，除咗玩殘車主，亦累埋業界。由於環保署嘅新措施宣傳不足，現時全港二十六間驗車中心只有四間設有跑步機，加上業界冇足夠培訓，唔止未能應付需求，反而影響新措施成效。大家話嘞，環保署同運輸署欠缺溝通，好似互相當對方透明咁，係咪活喺平行空間吖？
申訴專員批評，車輛跑步機測試已經推出超過十年，環保署同運輸署理應有足夠時間協調，做好政策及配套措施，點知事與願違，對此感到遺憾。而環保署就話喎，接納申訴專員嘅改善建議，承諾會聯同運輸署跟進及落實，包括加強對車輛排放測試嘅協調工作、加強向車主宣傳管制廢氣新措施，以及加強對維修業界嘅培訓及支援等。嗱，大家不妨聽住先，係咪真正改善，只能拭目以待。
話時話，港產官僚渾渾噩噩，搞到烏龍百出，何止令人遺憾，直頭令人憤怒喇。環保署推新措施打擊墨魚車，居然無同運輸署溝通，究竟有冇心減少廢氣，畫公仔唔使畫出腸喇；而運輸署作為交通專責部門，居然對環保署嘅新措施一無所知，或者知都唔去跟進配合，更加係無心無肺。咪畀人睇死吖，如果申訴專員唔踢爆，就算再過二十年、三十年，港產官僚一樣得過且過，尸位素餐，唔怪得空氣質素始終改善唔到喇。
見微知著，港產官僚食嘢唔做嘢，做嘢打爛嘢，施政混帳又點止呢單吖。申訴專員公署二○一五年工作簡報顯示，全年共接獲一萬三千宗查詢及五千三百多宗投訴，全部涉及政府部門及公營機構，最常見嘅投訴依次係「出錯意見/決定錯誤」、「監管不力」、「延誤/沒有採取行動」。港府施政甩漏百出，投訴數字仲多過墨魚車，問你服未。
官僚自掃門前雪，懶理車輛跑步機，環保署同運輸署固然係咁，整個政府亦係無晒靈魂。當局如果想有效減少汽車廢氣，不如減少廢官先喇！