香港寸金尺土，租金昂貴，有個舖位在手，基本上已經衣食無憂。不過咁，凡事都有例外，如果舖位落喺港產官僚手上，咁又唔同講法喇，隨時冇收入不特止，仲要倒貼添吖。
唔係講笑o架，食環署轄下有逾百個公眾街市，共有一萬四千幾個檔位，本來應該收錢收到手軟至係，點知事實啱啱相反，由於管理不善，甩甩漏漏，公眾街市空置率一直高企，搞到年年見紅，而且愈蝕愈大鑊，連申訴專員公署都睇唔過眼，決定主動介入調查。
申訴專員係咁講嘅，今次調查範圍包括食環署出租街市嘅制度及執管工作係咪存在不足，希望可藉此提出改善建議喎。即係咁，有調查總好過冇調查，肯正視問題總好過放任自流，但如果認為提出建議就可以令食環署撥亂反正，改善管理，咁就太過樂觀喇。
正所謂，冰凍三尺，非一日之寒。公眾街市嘅亂象已經唔係一朝一夕嘅事，除咗空置率高企之外，檔位被濫用、設施殘舊、雜物阻塞通道、衞生環境惡劣等等，問題多多，咁多年來一直冇改善。審計署曾多次發表報告炮轟，並提出唔少建議，但次次都如石沉大海。冇計喇，食環署官僚意見接受，態度照舊，就算今次申訴專員主動介入調查，結果亦唔會有乜分別嘅咋。
根據之前審計報告嘅數字，喺逾百個公眾街市中，超過一成空置率達到一半或以上，有啲出租率只有兩成多啲，幾乎十室九空咁滯。小數怕長計，淨係上個財政年度咋，公眾街市就蝕咗近三點二億元，再咁落去，多多公帑都唔夠浪費。試諗吓，如果呢啲街市屬於私人物業，有冇可能長期丟空吖？有冇可能年年倒貼吖？
見微知著，除咗公眾街市十室九空，食環署轄下嘅公眾熟食市場亦唔好得去邊。去年審計報告踢爆，全港有七十五個熟食市場，超過一千個檔位，其中十一個市場空置率高達六成一，一百四十幾個檔位空置超過十年，有啲甚至已空置二十九年，問你服未。
今時今日香港房屋問題嚴重，港府為搵地建屋而絞盡腦汁，出盡法寶，連綠化地都唔放過，甚至一度想打郊野公園主意，搞到被人批評「盲搶地」。但另一方面，食環署就任由公眾街市長期丟空，仲要年年倒貼，你話係咪敗家吖。
計功夫茶話齋，申訴專員都無謂再進行調查囉，食環署官僚冥頑不靈，渾渾噩噩，提出幾多建議都係嘥氣嘅咋。香港土地資源矜貴，與其任由食環署繼續生人霸死地，不如將公眾街市地皮用嚟興建房屋，幫助無殼蝸牛上樓好過喇！