中環蘭桂坊地方細細，其貌不揚，但就蜚聲國際，名聞遐邇，深受各地旅客歡迎。可惜吖，近年蘭桂坊藏污納垢，七國咁亂，已由「潮人蒲點」淪為「人間妖域」，睇見都眼冤。
唔係誇張o架，蘭桂坊除咗黃賭毒氾濫，仲係出晒名嘅「黑的」重災區，拒載、揀客、劏客等等，無奇不有，搞到香港個名臭晒。本報記者聖誕及除夕夜深入虎穴，喺蘭桂坊一帶視察，發現凌晨三時後黑的就空群出動，最少有三、四十架「冚旗」的士排隊駛入蘭桂坊，有啲就喺皇后大道中、德己立街及雲咸街兜圈，專揀外地旅客，本地人唔載，結果唔少旅客被劏到一頸血。
呢嗱，本報記者喺蘭桂坊扮旅客向一名冚旗的士司機表示要去灣仔，你估司機開價幾多？唔係嚇你，係一百五十元，比正常車資足足貴咗四、五倍，簡直係獅子大開口。咁都未算離譜，警方曾經接獲一宗投訴，有黑的司機喺蘭桂坊向女乘客開天索價，去天水圍要一千大元，幾乎仲貴過飛台灣嘅機票。
公道啲講句，全港的士司機數以萬計，絕大多數奉公守法，只有一小撮司機胡作非為，弊在一粒老鼠屎搞壞一鍋粥，少數黑的司機劏客，已足以損害成個行業甚至成個香港嘅聲譽。
話時話，冰凍三尺，非一日之寒，黑的劏客屢見不鮮，早就唔係新聞，當局唔係唔知問題有幾嚴重，亦唔係冇執法，警方去年就喺中區進行超過五百次打擊行動，因為濫收車資而被定罪嘅黑的司機有三十九人咁多。可惜吖，目前針對濫收車資、拒載或揀客等罪行嘅罰則過輕，最高罰款僅一萬元及監禁六個月，而且法庭經常輕判了事，毫無阻嚇力可言。
當然喇，蘭桂坊烏煙瘴氣，乜嘢亂象都有，又點止黑的劏客咁簡單吖。係人都知，蘭桂坊早就成為南亞及非洲裔假難民聚集嘅地方，呢班人以前仲識得顧忌，唔敢太過張揚，近年隨着人數愈來愈多，涉及嘅罪行亦愈來愈嚴重。最離譜嘅係，有啲假難民甚至淪為本地黑幫嘅僱傭兵，做「街招黨」嘅有之，恐嚇勒索嘅有之，涉及綁架嘅亦有之。呢，三名南亞人日前懷疑策劃綁架一名富豪，結果因為行蹤敗露而未能成事。正如有人話齋，假難民膽正命平，為咗錢乜都夠膽，隨時成為另一個「大富豪」張子強都似。
好明顯，假難民已經成為社會治安毒瘤，而之所以搞成咁，皆因港府假仁假義，來者不拒。咪話功夫茶唔提醒，目前累積嘅免遣返聲請個案已經超過一萬宗，當局再唔盡快諗辦法解決問題，任由呢個治安毒瘤繼續惡化，唔止蘭桂坊烏煙瘴氣，成個香港亦遲早淪為人間妖域嘅咋！