房屋問題積重難返，無殼蝸牛一屋難求，港產官僚係咪盡力覓地建屋唔敢講，有啲業主絞盡腦汁走法律罅就係鐵一般嘅事實。繼豬欄劏房、雞欄劏房同貨櫃屋之後，家陣又有「離地」屋，問你服未。
係咁嘅，元朗有農莊劏成八十塊小田，只需約一百萬元就可以購入千呎農地，唔少業主喺農地上興建豪華貨櫃屋，仲設有玻璃圍欄天台、涼亭同名貴棕櫚樹添，簡直同別墅豪宅冇分別。農莊職員向佯裝顧客嘅記者教路，只要間屋嘅底部離開地面，就唔會有問題，仲話可以替業主代購貨櫃屋，十萬元包地板、門窗、家電、廁所喎。
離地屋真係冇問題？當然唔係喇。地政總署表明，任何人均不得喺未經批准嘅農地搭建構築物，否則即屬違法，一旦當局證實農莊內有未經批准嘅構築物，將會向有關人士採取行動，要求業權人盡快糾正情況，否則會進行「釘契」咁話。
所以話，光棍佬教仔，便宜莫貪。用一百萬元買塊農地就可以做屋主，邊有咁着數吖，如果咁都得，香港就唔會周街都係無殼蝸牛喇。正如法律界人士話齋，喺農地築搭構建物屬違反地契條款，買家需要承擔法律風險。大家千祈唔好以身試法吖，否則做唔成安樂窩，反而惹來一身蟻，咁就弄巧反拙喇。
講嚟講去都係老問題，房屋供應長期短缺，搞到無殼蝸牛一屋難求，離地屋咪應運而生囉。近年來，唔同形式嘅僭建房屋好似雨後春筍咁湧現，豬欄劏房、雞欄劏房、貨櫃屋等輪流登場，簡直係五花八門，無奇不有。難為當局仲話最近租金及樓價有回落迹象，房屋問題初見曙光喎，簡直九唔搭八，講到底，港產官僚先至係真正嘅「離地」。
冇計喇，鬼叫港府無能咩，話就話將房屋問題列為施政「重中之重」，結果成為「弱中之弱」，覓地建屋寸步難行，慢過龜爬，旨意佢哋蛇都死喇。日前發展局公布元朗南發展計劃，聲稱準備將一百八十三公頃用地發展成三個住宅區，包括位於新市鎮嘅「都會生活區」、毗鄰大欖郊野公園嘅「樂活生活區」同位於唐人新村內嘅低密度「花園城區」，預計可以提供一萬六千多個公營房屋及一萬一千多個私人住宅。講到天花龍鳳，似模似樣，最怕到頭來又係大隻講咋。
點講都好，安居才能樂業，房屋死結成為所有社會問題嘅根源，港府絕對唔可以再懶懶閒，如果唔係，只會引發更多亂象，到時何止離地屋，隨時有樹頂屋、海底屋添吖！