農曆新年就到，相信唔少人都會計劃外遊充吓電，不過玩還玩，至緊要入鄉隨俗，有規有矩，否則遭人白眼、敗興而返事小，影衰香港人先至大鑊吖。
呢，有旅遊雜誌最近進行網上調查，發現一半受訪者外遊時會講價以及攞着數；超過六成人曾經喺公共交通工具上大聲講電話，至於其他乞人憎行為，仲包括對餐廳侍應呼呼喝喝、訂咗枱食飯之後又甩底、整到酒店房間污糟邋遢，以及郁啲就投訴等等，五花八門，無奇不有，真係唔到你唔服。
話時話，港產旅霸「揚威」外地，大家早就見怪不怪咯。早排馬來西亞某主題公園因為大停電而要關閉，有香港旅客情緒失控，大吵大鬧要求回水，幾乎出手打人咁滯，令人側目；又好似大受港人歡迎嘅日本民宿咁吖，有啲人但求方便，有理冇理訂定幾間，揀啱心水之後又唔取消其他訂位，搞到人哋大失預算。之前網上就瘋傳一張照片，相中一桌豐富料理無人起筷，枱面名牌寫上英文姓氏拼音「Wong」，懷疑有港客訂咗位後放飛機，雖然呢啲只係少數人嘅缺德行為，弊在一粒老鼠屎足以攪壞一鍋粥，愈來愈多民宿見過鬼怕黑，家陣都會要求港客先落訂，有啲甚至揚言以後唔接待港客添，你話係咪累街坊吖。
講真，呢啲只不過小兒科咋。大家應該記得，年前兩名港女遊台，將當地租住單位搞到七國咁亂，十足十戰場一樣，之後租都冇交，拍拍籮柚就走人。做租霸都算嘞，最離譜係又食又拎，連電視機都偷走埋。呢單嘢當時引發全台嘩然，兩位瘟神被收監之餘，仲被永久禁止入境，今次香港人乜架都畀佢哋丟清光咯。
諗落真係唔知好笑定好嬲。近年中港矛盾惡化，原因之一係本地人覺得內地客唔文明、唔禮貌、嘈喧巴閉，不屑與之為伍。部分港人出遊刻意避開內地團，同埋專登講英語，好似慌死畀人誤會係「強國人」咁，點知原來只係五十步笑百步，內地人有嘅毛病，香港人幾乎都有，最多係程度不同嘅咋，都咪話唔諷刺。
所以話，本是同根生，相煎何太急，即使有啲人口口聲聲Hong Kong is not China，甚至提倡香港民族添，查實香港人同內地人難兄難弟，基因一致，血濃於水，想唔認都唔得！
始終都係嗰句，人必自侮而後人侮之，無論香港人抑或內地人，出門旅行幾時都要入鄉隨俗，入境問禁，如果唔係，盞自取其辱嘅咋！