千呼萬喚始出來，猶抱琵琶半遮面。房委會檢討鉛水事件嘅最終報告終於出爐，話就話提出多項改善措施，可惜隻字不提追究責任嘅問題，擺明又係官官相衞，何止係「半遮面」，直頭係「全遮面」喇。
一如既往，呢份最終報告主要確認早前中期報告嘅觀點，即係承辦商、水喉匠以至物料供應商等整個行業從上而下對鉛水風險認知不足，成為爆發鉛禍嘅主要成因。報告將主要矛頭指向水喉匠，指業界評考合格率只有三成，而且培訓重點只放喺預防漏水，過程只有一堂教燒焊，亦無教分辨焊料，建議業界加強培訓喎。
即係咁，鉛水風波搞到滿城風雨，暴露食水系統問題多多，承辦商及水喉匠有責任，係毋庸置疑嘅事實。問題係，鉛水風波搞成咁，唔通當局就無責任？公屋合約訂明焊料不可含鉛，當局把關失職，既無監管，又無檢測，終於埋下禍根，如果業界責無旁貸，港產官僚更加難辭其咎喇。房委會嘅最終報告只提改善措施，唔提官員責任，唔係掩人耳目又係乜吖？
正如有人話齋，人嘅因素第一。無論檢討報告提出幾多改善措施，諗到幾多防範方法，如果官僚繼續敷衍塞責，得過且過，都係嘥氣嘅咋。好似加強業界培訓咁，提升水喉匠焊料嘅認知，提升施工工人嘅專業水平，固然係亡羊補牢之舉，但若然官僚繼續胡混度日，把關粗疏，一樣會有漏網之魚嘅咋。計功夫茶話齋，對鉛水風險最認知不足嘅唔係業界，而係港產官僚，提升警覺性嘅最佳方法就係賞罰分明，對失職官僚一律作出懲處，而唔係一味和稀泥！
正所謂，信佢一成，雙目失明，爆出鉛水醜聞後，當局曾經信誓旦旦會吸取教訓，防止類似事件重演，但從呢份「最終卸責報告」，就知道港產官僚死性不改喇。最好笑嘅係，當日多個部門紛紛成立委員會調查鉛禍，個個係威係勢，點知全部虎頭蛇尾，水務署係咁，房委會又係咁，由最高層成立嘅獨立調查委員會睇怕都唔會好得幾多，大家唔好抱咁大希望咯。
講開又講，港產官僚敷衍塞責，「鉛鉛不絕」嘅又點止食水吖。現時針對食物重金屬含量嘅法例已經沿用三十幾年，唔止嚴重落後，部分含鉛標準甚至比內地及國際寬鬆二十至六十倍，簡直匪夷所思。最離譜嘅係，當局至今依然闊佬懶理，連諮詢時間表都欠奉，問你服未。
內地股市熔斷機制引發恐慌，搞到要急急叫停。不過咁，如果香港官場引入熔斷機制，迫令庸官劣吏提早收檔，肯定大受歡迎o架！