現屆政府第四份施政報告尋日出爐，一如所料，無新意，無驚喜，引起劣評如潮，如果話今次報告有乜特色，就係同前三份報告一樣，成立呢個基金嗰個基金，多到幾乎十隻手指都數唔晒。你話喇，呢份到底係施政報告定係基金報告呢？
聽吓有乜基金先喇。首先係二十億元創科創投配對基金，跟住有鼓勵「一帶一路」國家學生來港升學嘅十億元獎學基金，然後係八億元資優教育基金，再嚟五億元創科生活基金、五億元保育歷史建築基金，仲有五億元農業持續發展基金、兩億元數碼港投資創業基金，同埋五千萬元環境及自然保育基金等，淨係數名字已經數到氣咳。
小數怕長計，咁多基金加加埋埋接近六十億元，連同其他新計劃嘅支出，成份施政報告嘅新增開支高達二千二百多億元，都咪話唔大陣仗。話時話，使幾多錢唔重要，最重要係用得其所，最怕呢啲基金好睇唔好食，到頭來形同虛設，咁就盞嘥氣嘅啫。
唔好怪功夫茶潑冷水，事實係港府往績欠佳，大部分基金都係得物無所用。遠嘅唔講，就講去年施政報告提出嘅十億元回收基金吖，話就話以配對形式資助回收商擴充業務，初衷唔錯（口架），實際上閉門造車，不切實際，加埋手續繁複，限制多多，結果基金推出後反應奇差，全港二千多家回收商，只得八十家提出申請，比例低至百分之四咁大把，唔承認失敗都唔得喇。
再講吖，今次推出嘅基金，大部分係新瓶舊酒咋。就以最大手筆嘅創科創投配對基金為例，只要企業能夠物色到私人或外國投資者提供資金，港府就會作出配對支持，聽落好似好吸引，查實同類嘅基金早就存在。呢，舊年財政預算案提出為「創新及科技基金」注資五十億元，當中包括預留款項協助初創企業融資，同埋以配對形式支持新企業。今次換湯不換藥，邊有「創意」可言吖。
講起就唔知好嬲定好笑，港府施政冇嘢叻，最叻就係成立呢樣、成立嗰樣。淨係委員會咋，已經成立近二十個，可惜絕大部分成效不彰，一味吹水。好似精神健康檢討委員會咁吖，成立咗兩年幾，至今連一份檢討報告都未交過，問你服未。難怪有人質疑，今次施政報告一口氣成立咁多基金，最終都係得個吉嘅咋。
冇法子喇，現屆政府上台三年幾，施政期票開完一張又一張，彈票走數一次又一次，早就見怪不怪咯。今次施政報告又整大龍鳳，到底有幾多政策可以落實，大家心照喇。