快樂係乜嘢？有人話係一種感覺，虛無縹緲來去無蹤；有人話係一種習慣，要持之以恒苦心經營；有人話係一種選擇，關鍵係能唔能夠放低。其實，計功夫茶話齋，快樂就係生活無憂，如果連安居樂業都做唔到，講乜都係假。
有學者研究發現，一個人快唔快樂同民族基因有關喎，墨西哥係幸福感最高嘅國家，而中國內地、香港、台灣等就屬於唔快樂嘅地區。學者認為，快樂、輕鬆等感覺同財富、健康等因素並無明顯關係，甚至同地區安全存在相反關係添，所以拉丁美洲同部分非洲國家嘅謀殺率及搶劫率全球最高，但當地人民卻自覺最快樂同最輕鬆咁話。
嗱，信不信由你，快樂係咪同民族基因有關，有冇科學根據，唔會有真正嘅答案，大家可以自行判斷。不過咁，講到香港人唔快樂，就完全唔使懷疑，撇開民族基因唔講，淨係講不斷惡化嘅生活環境同重如千斤嘅生活壓力，就已經好難令人快樂喇。
好似房屋問題咁吖，香港話就話係富裕社會，但係好多市民連一個安身之所都可遇不可求，住劏房已經算唔錯嘅喇，有人甚至要瞓豬欄、雞欄添。以前住公屋自己都覺得無面，今日輪到公屋直頭好似中咗六合彩，你話係咪可悲吖。喺咁嘅環境下，就算香港人有快樂基因，都係嘥氣嘅咋。
仲有吖，香港經濟長期低迷，市道不景，好多打工仔人浮於事，搵朝唔得晚。特別係最近經濟陰霾密布，前景一片暗淡，旅遊業陷入寒冬，更加係隱憂重重。旅遊業係最多低技術工種行業，成個行業唔掂，首當其衝嘅就係基層市民，如果情況持續落去，好多人何止唔快樂，隨時連兩餐都成問題吖！
都係嗰句喇，擁有財富未必會快樂，但如果連基本生活都成問題，想快樂都幾難。歸根究柢，香港人之所以唔快樂，除咗民族基因之外，最大原因就係生活環境不斷惡化，既睇唔到出路，亦睇唔到希望。最令人反感嘅係，港府不知民間疾苦，今年施政報告冇為市民排憂解難不特止，反而一味顧左右而言他，唔係吹噓一帶一路，就係講行人過路燈時間，簡直不知所謂。
計功夫茶話齋，香港人有冇快樂基因好難講，但係港產官僚擁有低劣基因就係鐵一般嘅事實。不如咁喇，學者不妨研究吓點樣改善官僚嘅劣質基因，如果成功，絕對可以獲諾貝爾獎o架！