大事做唔到，小事做唔好，就係港府嘅最大特色。好似「欣賞香港」運動咁，話就話要令市民欣賞、感激、理解香港，並為香港增值，可惜吖，港產官僚講就天下無敵，做就有心無力，結果淪為一場政治騷，純粹得啖笑。
係咁嘅，港府自上月中起啟動為期五個月嘅「欣賞香港」大型運動，聲稱有十大亮點，其中一項係本月康文署免費開放轄下十七間博物館，例如茶具文物館、香港文化博物館、香港科學館等等。啱啱發表嘅施政報告仲自賣自誇，聲稱措施反應良好，決定恒常免費開放康文署指定嘅博物館常設展覽喎。
即係咁，向市民免費開放博物館，本來係一件好事，可惜雷大雨小，水分多多，所謂反應良好純屬吹水唔抹嘴。呢，本報記者實地視察發現，十七個博物館中，十二個本來已經免費開放，即係話「欣賞香港」運動嘅所謂十大亮點根本就係作大。再講喇，就算博物館免費開放，市民亦未必有福消受，好似香港茶具文物館咁，由於做緊翻新工程，預計年底至完成，依家去參觀只能摸門釘咋；至於最受歡迎嘅香港藝術館同香港太空館，亦正進行翻新及擴建工程，市民隨時乘興而去，敗興而返，連車錢都蝕埋。
最好笑嘅係，好多市民根本唔知有「欣賞香港」呢個運動；有市民甚至唔領情，認為免費入博物館唔會令佢哋欣賞香港，當局不如留番啲錢好過喇；亦有人認為當局只係做吓門面工夫，要令港人真正欣賞香港，解決經濟及民生問題至係上策。
冇錯嘞，要令市民欣賞香港，首先就要搞好香港。今時今日香港問題多多，經濟低迷，民生凋敝，衣食住行樣樣難，尤其係房屋問題不斷惡化，更加成為無殼蝸牛嘅噩夢。試諗吓，家陣劏房遍地開花，連豬欄改建嘅居所都成為搶手貨，咁悲情嘅社會叫人點樣欣賞呢？仲有吖，香港老人問題愈來愈嚴重，唔少長者臨老唔過得世，而港府就一味恐嚇可能出現結構性財赤，連全民退休保障都唔肯承擔，咁又叫人點樣欣賞呢？
講到底，「民生無小事」，唔係靠吹水架。當局早前大鑼大鼓搞「家是香港」及「築福香港」等等運動，結果被人批評做騷咁做，睇嚟今次「欣賞香港」亦唔例外。正所謂，空談誤國，實幹興邦。港產官僚與其勞師動眾舉辦呢啲有姿勢冇實際嘅運動，不如真真正正做一兩件實事。好簡單，如果港府肯順應民意，盡快落實全民退保，保證全港市民都識得「欣賞香港」。