從前有一個二世祖，繼承父親大批稀世古玩，不過佢唔識寶，從未善加利用創造財富，反而成日呻窮，結果真係做咗一世窮光蛋。港府似唔似呢個二世祖吖？坐擁大量空置校舍而不知善用，白白糟蹋寶貴土地資源，簡直就係暴殄天物喇！
嗱，立法會政府帳目委員會繼續聆訊空置校舍問題，多名議員炮轟當局失職，導致校舍流轉速度緩慢。唔講唔知，全港現時約有一千間中小學，而數據庫顯示空置校舍達二百三十四間，即係每四間學校就有一間空置，你話係咪浪費吖？你話係咪敗家吖？
面對炮聲隆隆，教育局解畫話喎，二百多間空置校舍中有二十七間已經或將會拆卸，部分亦已轉交其他部門作其他用途，真正喺該局手中嘅只係佔少數喎。地政總署亦否認失職，話一般要收到教育局通知至能夠啟動收地程序，該署需研究相關校舍係位於官地抑或私人土地等問題，所以需時較長咁話。
大家知道點解空置校舍一直問題多多喇，政府部門互相卸責，闊佬懶理，唔亂象叢生至奇喇。教育官僚好似玩擊鼓傳花，將空置校舍交咗畀其他部門就關人個關，而地政總署就大玩官僚作風，收地歎慢板，你急佢唔急，問你服未。喂，收回私人土地上嘅校舍就話可能要較長時間啫，但係根據早前審計署報告踢爆，至少有九間官地校舍平均空置達十一年，咁又點解釋吖？再講，就算校舍位於私人土地，都唔係收地歎慢板嘅藉口o架，港府一邊猛呻缺地建屋，一邊任由大量土地荒廢，講起都折墮喇！
本港房屋問題積重難返，死結正正係土地供應嚴重不足，港府卻坐視空置校舍長期丟空，簡直不可理喻。係人都知，本港人口高峰期已經過去，部分學校長期收生不足，好多空置校舍根本無機會再作教學用途，以前房屋問題未算嚴重就話啫，家陣土地嚴重匱乏，居然繼續任由荒廢，點都講唔過去喇。最難得嘅係，空置校舍早已擁有基本設施，有水有電有廁所，只要稍為修葺一下，就可以住人，當局點解唔因利乘便呢？如果怕地區反對，咪暫時改建成中轉屋囉，點都好過要無殼蝸牛被迫以豪宅租金瞓雞欄、豬欄吖，係咪？
港府經常煞有介事統籌各部門處理問題，連消滅紅火蟻都成立跨部門小組應付，而處理空置校舍涉及房屋問題，關乎全港市民福祉，反而各自為政，欠缺溝通，簡直混帳。難為當局一時見縫插針，一時寸土必爭，一時要打郊野公園主意，話要全力覓地建屋，搵鬼信咩。
唔怪得港府成日被人鬧「盲搶地」喇，咁多校舍空置都睇唔到，唔係盲又係乜嘢呀。