狗咬人唔係新聞，人咬狗至係新聞。同樣道理，立法會拉布唔係新聞，唔拉布至係新聞，特別係今時今日，無論大事或小事，政治或民生，任何議題都逃唔過反對派政客嘅阻撓，搞到立法會七國咁亂，市民怨聲載道。
公道自在人心，由承建商、專業團體及工會等十六個團體組成嘅建造業大聯盟終於忍唔住，炮轟部分議員喺財務委員會及工務小組委員會拉布，拖延工程項目進度，嚴重損害工人生計，要求兩個委員會嘅主席果斷「剪布」咁話。
嗱，呢啲就係民意喇。又難怪業界咁憤怒嘅，工務小組本年度預計審議七十二項合共六百七十五億元嘅工程撥款申請，點知去年九月復會至今只通過四項合共四點七億元嘅小型工程，而財委會更僅僅通過兩個涉款二億元嘅小項目，以咁嘅進度，根本冇可能喺餘下時間通過所有工程項目撥款。
正如業界人士話齋，大部分建造中嘅政府工程將於未來一、兩年完成，包括港珠澳大橋及中環灣仔繞道等，如果新項目繼續拖延，建造業工人冇工開，隨時重演沙士期間因工程不足而導致近兩成工人失業，受影響家庭人數高達一百四十萬，都咪話唔大鑊。
正所謂，斷人衣食，如殺人父母。立法會拉布流會成為常態，各項議題嚴重受阻，政客人工照（手豆），絲毫無損，只係難為咗班建造業工人咋，好多人連生計都成問題，只能望天打卦。最弊嘅係，拉布除咗影響建造業，亦拖累物料供應、採購、物流等相關行業，整體經濟以至成個香港都無運行。
唔係誇張（口架），就講上個立法年度吖，港府原預計向立法會提交近四十個總額四百三十億元嘅工程項目，結果財委會僅批准十三個合共三十六億元嘅項目。其中二十一個項目需延至今個立法年度審議，唔止損失最少半年時間，仲導致工程費增加超過十億元，你話納稅人係咪冤哉枉也？
冇法子喇，今日香港諸事不順，頭頭碰着黑，立法會拉布固然無日無之，有人濫用司法覆核更加搞到烏煙瘴氣。港府數字顯示，去年全年司法覆核申請多達二百五十九宗，比前年大增逾五成四。唔好以為係小事吖，司法覆核浪費公帑事小，阻礙工程及經濟發展事大，港珠澳大橋就係因為受到司法覆核阻撓而導致工程延誤一年，成本最少增加六十幾億元，問你怕未。
所以話，政客無事生非，添煩添亂，唔止靠害工人，而且拖累成個香港。喺度順便一提，尋日功夫茶話香港茶具文物館做緊翻新工程，參觀者隨時摸門釘，而康文署就話工程期間照常開放喎，大家放心參觀可也。