近年世界各地被難民問題搞到焦頭爛額，好多地方尤其係歐洲國家紛紛收緊政策，堵塞門戶，唯獨香港依然中門大開，來者不拒，簡直係唔衰攞嚟衰！
有辦你睇（口架），難民政策一向寬鬆嘅德國，自從發生科隆難民集體性侵及搶劫案後，亦急急修改法例，將有刑事紀錄嘅難民即時驅逐出境，又將阿爾及利亞、摩洛哥及突尼斯等國家列為安全國家，唔接受嚟自當地難民嘅庇護申請；丹麥嘅措施更加嚴厲，除咗延長難民申請與家屬團聚嘅時間，更通過法例沒收入境難民攜帶嘅現金及貴重物品。當然喇，人權組織例牌又係說三道四，批評違反人權喎，問題係，面對源源不絕嘅難民潮，唔採取非常措施，唔通翹埋雙手坐以待斃咩？
咪以為唔關香港事吖，本港難民人數雖然冇歐洲咁多，弊在十個難民冇個真，呢啲主要嚟自南亞及非洲嘅假難民，利用聲請機制嘅漏洞，以各種藉口喺香港賴死唔走，有人以避債為由「聲請又聲請」，有人滯港十年連生九子，五花八門，無奇不有。
市民又點睇呢？「東方報業民意調查」顯示，大部分受訪者指大量假難民湧港，浪費公帑兼影響社會治安，認為現行聲請制度令堵截人蛇變相無效，當局除咗要盡快修改法例，亦要揪出幕後黑手，堵塞人蛇來港途徑。
冇錯嘞，假難民問題愈演愈烈，搞到香港雞毛鴨血，唔到當局唔正視（口架）。呢，話口未完又嚟喇，連日來多批南亞非法入境者分別喺將軍澳及大嶼山登陸被截，淨係今年第一個月咋，警方已截獲一百多名南亞人蛇，問你怕未。係人都知，呢啲假難民嚟港嘅目的就係搵真銀，唔係打黑工，就係作奸犯科，有啲甚至淪為本地黑幫嘅僱傭兵，打架、販毒、貼街招勒索富豪等等，無惡不作。有人形容假難民係治安毒瘤，一啲都冇誇張。
話時話，假難民問題已非一朝一夕嘅事，過去當局一直闊佬懶理，直至本報發揮第四權監察力，鍥而不捨踢爆種種亂象，尤其係將本地黑幫到南亞「揀蟀」嘅真相公諸於世，港府先至肯正視問題，施政報告仲承諾檢討相關機制添。所以話，呢個世界幾時都唔可以缺少傳媒嘅監督，如果冇咗第四權，香港只會更加混亂嘅咋。
始終都係嗰句，當斷不斷，必受其亂。香港已經七國咁亂，加上假難民問題，更加烏煙瘴氣，再唔盡快諗辦法解決，遲早爆大鑊都似。正如多數受訪者話齋，對待假難民毋須手軟，除咗即捕即解，香港亦應該考慮退出聯合國《禁止酷刑公約》，咁至可以一勞永逸解決問題。港產官僚收到未吖！