有人話，唔嚟香港，唔知文革仲搞緊，真係一啲都冇誇張。睇吓香港大學七國咁亂就知喇，部分學生搞政治多過讀書，而且愈嚟愈偏激，愈嚟愈暴戾，十足十當年嘅紅衞兵咁。
呢，部分港大學生因為不滿李國章出任校委會主席，要求廢除特首出任校監嘅制度，發起罷課抗議，結果只得寥寥一、兩百名學生響應。可能搞手覺得冇面啩，前日李國章首次主持校委會會議，雖然已經同意成立專責小組檢討大學條例，回應罷課學生訴求，而且得到所有校委一致贊成，點知學生依然不肯罷休，結果再次演變成暴力圍堵及禁錮校委事件。
事件擾攘到半夜，李國章等校委需由警方護送至可以安全離開，連港大校長馬斐森都忍無可忍，譴責學生所作所為同暴徒冇分別，唔止令佢覺得生命受威脅，仲嚴重影響校譽，講明會將當晚錄影片段交畀警方調查。大家睇到喇，連一直被指偏幫學生嘅洋校長都睇唔過眼，就知道學生嘅行為幾咁離譜。
好多人唔明白，校委會已經同意成立專責小組，點解學生仲要發起暴力衝擊呢？咁就要問吓港大學生會頭頭馮敬恩嘞。有校委話齋，會議一直氣氛良好，但馮敬恩席間不斷用手機傳短訊，擺明想激發學生情緒。最騎呢嘅係，馮敬恩會內投贊成票，會外圍堵校委，神又係佢鬼又係佢，問你服未。
正所謂，人無信不立。上次嘅副校長風波，馮敬恩因為違反校委會保密協議而受到千夫所指，點知佢唔止冇好好反省，反而變本加厲。係人都知，國有國法，家有家規，入咗校委會，就應該遵守相關制度，否則就應該退出，呢個道理堂堂大學生冇可能唔清楚（口架），馮敬恩出爾反爾，破壞規矩，成個二五仔咁，難為事後仲死撐話場外嘅學生想即時成立專責小組，佢先至參加圍堵喎，簡直係擘大眼講大話。呢，電影導演王晶就講得啱喇，僱主千祈唔好僱用呢啲毫無誠信嘅人，以免引狼入室吖！
講起就心噏，港大本來係亞洲首屈一指嘅百年名校，尤其係徐立之時代，港大國際排名仲一度躋身全球第十八位添。點知好景不常，近年港大好似撞邪咁，師生不務正業，淨係掛住政治鬥爭，唔止成為佔領大本營，仲鬧出副校長及圍堵禁錮風波，沒完沒了，排名唔跌至奇。嗱，最新公布嘅全球百大工商管理碩士課程排名，港大插水式暴跌，咪就係最佳例證囉，唔通呢間百年學府真係氣數已盡？