呢幾日市區氣溫屢創新低，凍到入心入肺，大帽山更錄得破紀錄嘅負五度低溫，遊人爭相冒寒觀霜，仲有網民上載冰凌樹掛及疑似飄雪奇觀。不過咁，香港結冰都未夠奇，最奇係本港天文台明明實牙實齒預測有九度（口架），如今氣溫差天共地，唔通正如歌仔所唱「天氣不似預期」?
講真，今次寒流好大劑，半個地球被冰封，香港出現歷史罕見低溫係好正常，其實全世界天氣預報機構一早指本港會跌至攝氏零至四度喇，仲預測本港北區有機會跌破冰點添。可惜吖，唯獨本港天文台打死唔信，力排眾議「唱暖」，結果咪淪為國際笑話咯。
難怪有網民話「都係外國勢力好啲」，仲寫打油詩贈興曰： 「香港天文台，真係好易做。周日會落雪？佢死都話No！外國估零度，佢話有九度；偏偏寒流到，勢色唔對路。於是日日減，每日減一度，減到去周五，周日得六度。咁樣預測法，不如唔好做；如果真落雪，抵你畀人嘈！」可謂一針見血，笑死冇命賠呀喂。
好嘞，依家擺明外國嘅月亮係圓過香港，天文台又有乜解釋呢？佢哋話喎，極端天氣較難預測，因掌握嘅相關天氣數據有限，仲好意思話同外國氣象組織嘅預測屢現不同，佢哋唔需要妄自菲薄，天文台已盡量預測最接近嘅數字咁話喎。
嗱，呢啲咪係死雞撐飯蓋囉。冇錯，天氣預測冇話百分百準確，再加上去年出現史上最強嘅厄爾尼諾現象，極端變化席捲全球，預測天氣稍有失誤係好難避免。弊在天文台不知天氣大勢，明明有外國權威數據唔用，一味剛愎自用，斷估無痛苦，仲話人哋冇本地歷史數據預測添，卒之錯到離晒譜，咁都唔認衰，係妄自尊大就真。
最好笑嘅係，天文台呢頭話至今仍未收到落雪報告，嗰頭又話預測尋日有幾陣雨及小冰粒，分明想補鑊喇。結果係點，結果尋日係陽光普照，天氣回暖，天文台衰多一鑊，簡直瘀到爆。
話時話，天文台嘅預測失準，都唔係今時今日嘅事（口架）嘞，就好似掛風球咁吖，明明係三號風球，風力居然係十號；明明掛八號波，風力弱過風扇都有之，真係信佢一成，雙目失明。
一句到尾，港產官僚冇嘢叻，最叻係逢估必錯，財爺年年例牌估錯庫房收入都算嘞，天文台預測天氣一味靠估，玩殘市民事小，如果外國旅客信以為真，出門帶少件衫帶少把遮，分分鐘客死異鄉都有之呀。計功夫茶話齋，天文台不如改名叫「呃人台」，等大家有所防備，自求多福好過。