唔怕貨比貨，最怕唔識貨。東方報業集團旗艦網站「on.cc東網」立足香港，面向全球，致力打造最強華人資訊網，深受各界歡迎，點擊率節節上升，可以講係氣勢如虹，誰與爭鋒。
唔係賣花讚花香，有數字為證（口架）。國際市場調查公司comScore研究顯示，東網勇奪新媒體三項第一，包括全港瀏覽人數最多、全港瀏覽量最高、全港讀者瀏覽時間最長，大幅拋離第二位嘅壹傳媒網站，證明讀者係識貨之人。
調查公司係咁講嘅，東網去年十一月嘅三大數據都刷新紀錄，其中來自香港嘅不重複瀏覽人數比上個月增長一成一，創出一百五十四萬八千人嘅高峰，而且呢個數字只係來自香港讀者嘅獨立人數，只佔東網讀者總數一小部分咋；東網面向全球，讀者群龐大，總數係上述數字嘅幾倍。反觀壹傳媒網站嘅不重複瀏覽人數只得一百四十萬左右，不升反跌，相形見絀。
除咗瀏覽人數獨佔鰲頭，東網來自香港讀者嘅總瀏覽網頁數亦屢創高峰，高達八千二百萬頁次，比壹傳媒網站嘅五千七百萬頁次，高咗四成三咁多，簡直係蚊髀同牛髀。至於來自香港讀者嘅總瀏覽時間，東網亦高達八千三百萬分鐘，每位讀者平均瀏覽時間達五十三點八分鐘，成為全港之冠，唔到你唔服。係人都知，瀏覽人數愈多、瀏覽時間愈長，代表廣告接觸讀者嘅層面愈廣、效益愈大，廣告客戶自然識得選擇喇。
正所謂，有麝自然香。東網點擊率不斷飆升，屢創驕人成績，原因好簡單，咪就係因為資訊最好、最多、最全面囉。尤其係全新三合一東網APP上月登場後，將原來嘅東網港澳、東網大陸及東網台灣三個APP合而為一，反應更加熱烈，讀者一APP在手，即可輕鬆穿梭於唔同地區嘅新聞資訊，而且可以隨時切換，既方便又快捷。
最值得一提嘅係，東網為咗精益求精，不斷提升功能及內容質量，屢創傳媒先河。例如將報紙內容原汁原味上網，就係全港首創，全世界讀者都可以隨時隨地免費閱覽《東方日報》及《太陽報》電子報；又例如直播六合彩攪珠及港超聯足球賽事，亦係東網首創，寫下香港傳媒史光輝一頁，都咪話唔威水。
仲有吖，東網唔少新增功能亦大受好評，好似「推播通知」（Push Notification）設定功能咁吖，讀者可以自主選擇接收邊種推播通知，包括新聞、娛樂、財經、體育及生活，仲有靜音模式添，適合唔同讀者嘅需要，係咪好周到呢。
一句講晒，上東網，知天下。東網一枝獨秀，全靠各位讀者支持，我哋一定會繼續努力，務求盡善盡美。欲窮千里目，更上一層樓！