係人都知，本港公營機構係退休高官嘅俱樂部，所謂公開招聘，無非走吓過場，所以港府最近宣布翻閹前運房局常秘栢志高出任西九文化區營運總裁，本來一啲都唔出奇，但奇就奇在，呢位洋高官退休不足半年，完全當三年「過冷河」期規定冇到，擺明破壞規矩，唔怪得接受「東方報業民意調查」嘅大多數市民狠批當局開壞先例，擔心造成延後利益。
市民嘅批評唔係無的放矢。栢志高喺推廣藝術方面有幾把炮冇人知，但佢係前特首曾蔭權爵士嘅愛將就周街都知，特別係當年貪曾求見前教宗本篤十六世嘅醜聞中，佢擔任穿針引線嘅重要角色，結果呢頭退休嗰頭就獲委任呢份年薪超過四百萬元嘅筍工，你話背後冇景轟喎，三歲細路都唔信喇。雖然當局口口聲聲話栢志高任職運房局時，冇直接參與西九文化區事宜，所以冇利益衝突，但正如學者話齋，運房局牽涉高鐵事宜，而西九又喺高鐵嘅興建範圍內，同現職好易產生利益衝突。
真係諗極都唔明，西九營運總裁話就話全球公開招聘，點解千揀萬揀，最終都係揀着個退休高官，到底香港真係冇人才，抑或港府肥水不流別人田，專益自己友，只要睇吓近年公營機構嘅掌舵人，無論係申訴專員、私隱專員公署抑或平機會，清一色都係過氣高官，就知咩事啦。四成五受訪者批評港府優待前高官；兩成七認為係明益自己人，證明市民眼睛係雪亮嘅。
正所謂能者居之，只要真係做到嘢，任用退休公務員未嘗不可。問題係港府似乎對官場廢電池情有獨鍾，次次益自己友，次次搞到一鑊泡，添煩添亂。最經典嘅當然係前食衞局局長周一嶽啦，佢任內劣迹斑斑，自己更捲入僭建醜聞，早就人人喊打，點知佢退休後竟獲邀出掌平機會，繼續發揮每周一鑊精神，港府好揀唔揀，係都要揀呢條廢柴，簡直係唔衰攞嚟衰。
講開又講，港府除咗有鋪翻閹癮，仲迷信洋和尚會唸經，栢志高既係洋人又係退休高官，一次過滿足晒兩個願望，難怪咁受器重。不過咁喎，事實證明外國月亮唔一定特別圓，就講西九吖，前行政總裁謝卓飛係洋人，上任得嗰半年，櫈都未坐暖就詐病走人；現任總裁連納智同樣係洋人，正事冇做過幾件，反而鬧出過天價買入次貨藏品嘅國際笑話，估計栢志高亦唔好得去邊。四成三受訪者直指港府無吸取教訓，三成一人認為重用洋人物非所值，可謂一語中的。
正如古人話齋，德不稱其任，其禍必酷；能不稱其位，其殃必大。港府反其道而行，用人不問能力，只問膚色，唔理好醜，但求自己友，唔撞板多過食飯至奇喇！