尋日係開學日，莘莘學子放完暑假重返校園，老師同學再聚首一堂，原本係一件開心事，不過咁，對於跨境學童嚟講，返學直情好似去西天取經咁，長途跋涉，真係有苦自己知。
唔係誇張。今年實施所謂跨境專屬校網，四千幾名跨境小一學童被派往馬鞍山、黃大仙甚至東涌等遠離邊境嘅地區返學，搞到交通大混亂。其實好多人一早批死，當局亂點鴛鴦，將學童流放到冇雷公咁遠，一定搞個大頭佛出嚟，結果不幸而言中。嗱，大批學生逼晒喺朝早過關，令關口應接不暇，其中深圳灣口岸更加係重災區，校巴大排長龍，足足要排成粒鐘至通到關，黃大仙一間學校嘅兩架校巴更分別遲到半個鐘及四十五分鐘添。
最離譜嘅係，教育局局長吳克儉唔知攞景定贈興，居然話當局派員到關口視察跨境生過關情況，認為整體順利，仲大讚專屬校網起到分流作用喎。乜話？逼爆關口都叫過關順利，遲晒大到都叫成功分流，呢啲到底係咩邏輯？淨係一個開學日就搞到七國咁亂，怨聲載道，唔怪得吳克儉叫「唔得掂」啦。
話時話，今時今日唔止跨境學童返學難，本地學童亦唔好得去邊嘅咋。近年校巴荒問題愈來愈嚴重，僧多粥少之下，校巴收費年年三級跳唔在講，最離譜係試過有學生被拒載搞到流落街頭，亦有校巴「僭建」座位增加載客量，無奇不有，亂象叢生，依家再加上跨境學童呢班生力軍，唔亂上加亂至奇。
當然喇，跨境學童年年增加，皆因雙非問題引起，而雙非問題千頭萬緒，校巴荒只係冰山一角咋。好似被納入跨境專網嘅大埔同元朗區咁吖，唔少學校要面對加派問題，有啲每班要收三十一人，由小班變大班之餘，人手又冇增加，教學質素會唔會受影響，唔使講都知喇。
講嚟講去，雙非問題尾大不掉，港產官僚後知後覺，得過且過，絕對難辭其咎。對於雙非童回流香港讀書嘅問題，當局一直漫不經心，直到問題開始惡化，至向雙非家長了解情況。本來呢，遲到好過冇到，有了解好過冇了解，弊在當局完全提唔出解決方案，淨係搞咗個跨境專屬校網敷衍了事，結果引發中港家長互相指摘，製造矛盾，添煩添亂，真係多得佢哋唔少。
咪話功夫茶唔提醒，雙非問題陸續浮現，跨境學童仲會繼續增加，港產官僚一味頭痛醫頭、腳痛醫腳，盞愈醫愈大鑊嘅咋！