新學年開學亂象啱啱止息，又到下學年新一批學生同家長發愁嘞。事關明年適齡升小一學童人數再創新高，唔止北區學額爭崩頭，爭位潮仲蔓延到全港市區，唔愁就假咯。
嗱，明年小一自行派位今個月底接受報名，根據《各小一學校網小學名冊》顯示，唔計私立及直資學額，明年全港官津小學共提供四萬八千零八十個小一學額，比今個學年微增二百五十五個咋。反觀明年升小一嘅學童人數顯著增加，達五萬九千人，比今年仲多二千人，連同跨境學童，人數更達六萬三千人。有數得計，學額足足欠成萬幾個。今年小一派位已經係一片混亂，明年就肯定係亂上加亂喇。
唔係靠嚇，北區學額爭崩頭嘅情況已經蔓延至全港，港島東更加係重災區添。本報記者計過，即使該區各校加一班小一，仍欠一千五百五十個學額，即係有相同數量嘅學生冇位讀書，點算？至於名校林立嘅九龍城區，雖然有新校遷入，部分小學明年「大幅加班」，但計落仍欠一百九十五個學額，一樣會有學生落空嘅咋。
學古人話齋，思則有備，有備無患。既然當局明知學額仲差咁多，如果家陣就諗辦法，都唔係話冇得補救嘅。不過咁，港產官僚出名四方木，唔踢唔識郁，小一派位緊張唔係新問題，問題係班官老爺點極唔化，睇吓今年小學派位嘅亂象吖，教育局話就話推出「跨境學童專屬校網」，但學額得三千個咁大把，當中北區更加只得三百個，根本唔夠分。咁仲唔止，當局平時唔燒香，臨急抱佛腳，一時搞加班，一時搞借位，一時又話推出「短命學校」應急，完全亂晒套，本地家長媽聲不絕不特止，仲搞到中港家長矛盾激化添。
學額不足問題困擾香港多年，教育局始終束手無策，淨係識得小修小補，得過且過。最令人擔心嘅係，雙非兒童累積成二十萬，到底有幾多回流返港，當局根本冇底。可以肯定嘅係，雙非童來港讀書有增無減，有小學校長話，唔少雙非家長為咗鋪排子女入讀心儀學校，扭盡六壬，唔係大手筆喺香港置業，就係借親友屋企充當住址，學位爭崩頭嘅情況只會愈演愈烈咁話。
一日都係前朝貪曾政府累事，明明冇咁大個頭，偏偏要戴咁大頂帽，學人搞乜鬼醫療同教育產業，對內地大肚婆中門大開，結果咪搞到家陣咁閉翳囉。話貪曾係千古罪人，一啲都冇誇張。
點講都好，現屆政府接咗前朝嘅爛攤子，就有責任搞番掂佢，一味頭痛醫頭，腳痛醫腳並唔係辦法。教育局局長吳克儉，你老哥都唔想「唔得掂」頂帽戴到底o架！