「路上零意外，香港人人愛」，港府嘅交通安全宣傳口號，大家耳熟能詳，係人都唔想發生交通意外，弊在當局講一套做一套，對安全漏洞視而不見，見而不理，搞到意外頻生，危機處處。
嗱，近月本港接連發生兩宗涉及長者司機嘅嚴重交通意外，就係一個明顯嘅安全漏洞。正所謂，年紀大，機器壞，老人家除咗身體機能衰退，反應亦比後生仔慢，萬一遇到路面緊急情況，好易出事咋。尤其係本港道路又窄又彎又多斜路，長者司機本來已經唔易應付，如果再患有白內障等老人病，咁就更加危險喇。
唔係危言聳聽。運輸署數字顯示，過去三年涉及六十歲或以上嘅駕駛者傷亡數字，一一年有六百五十六宗，一二年為七百六十一宗，一三年進一步增至八百四十二宗，問你怕未。
根據現時法例，話就話規定七十歲以上駕駛者續牌時須提交體格檢驗報告，但有關規定唔止過時，亦唔夠全面，連影響駕駛安全嘅視力對比度及關節健康都欠奉，而且申請續牌三年嘅長者毋須年年驗身，擺明就係一個漏洞喇。唔講唔知，舊年七十歲或以上嘅駕駛執照持有者達到二萬六千人，好多長者司機從事小巴及的士行業，長時間喺道路上奔馳，交通安全風險大增，都咪話唔令人擔心。
有人可能會話，長者司機喺外國好普遍啫，英國有位一百零五歲嘅老人家一樣車出車入添。即係咁，如果身體條件達標，年齡的確唔係問題，問題係本港條例過時，漏洞多多，咁又唔同講法喇。不妨睇吓其他國家究竟點做，美國多數州份要求續牌長者通過視力測試，如果表現異常，仲要測埋體能同智力測試；加拿大就要求八十歲以上駕駛人士每兩年續牌一次，同樣要通過視力測試；澳洲昆士蘭由今年一月起，要求七十五歲以上駕駛人士每隔一年就要接受醫生檢查，冇問題至可以繼續駕駛；日本東京仲嚴格，六十五歲以上長者司機要確認眼力、手腳反應同駕駛能力等，至可以獲續牌。反觀香港運輸署懶懶閒，對長者司機監管寬鬆，有乜辦法唔頻頻出事吖。
正如道路交通安全專家話齋，長者司機若年年驗身，可以提高對道路及途人安全嘅保障，對人對己都有好處，當局應該研究收緊現行規定。冇錯嘞，當局監管不力，等於製造「公路炸彈」，唔止不負責任，簡直就係靠害。咪話功夫茶唔提醒，馬路如虎口，如果運輸署官僚唔想被虎噬，就要快快修例，堵塞漏洞喇！