年年歲歲花相似，歲歲年年人不同，每逢內地長假期，香港旅遊業例牌亂象叢生，醜聞多多。嗱，「十一」黃金周又到喇，今次又會發生乜嘢事呢？
話說為打擊強迫購物同零負團費，內地舊年十月起實施《旅遊法》，初頭係威係勢，內地訪港購物團幾乎絕迹。可惜吖，風頭一過，購物團死灰復燃，今年首七個月訪港內地團總數接近九萬個，較舊年同期微升百分之一點四，當中主要係購物團，可見購物團已經重奪主導地位嘞。
購物團好似百足之蟲，死而不僵，其實一啲都唔奇怪。正所謂，殺頭生意有人做，蝕本生意冇人做，有購物團領隊踢爆，每做成一單生意，旅行社可以抽三成佣，都咪話唔和味。再講吖，《旅遊法》先天不足，漏洞多多，根本係無牙老虎。正如業界人士話齋，《旅遊法》容許旅行社同旅客簽訂同意書後安排購物行程，變相令購物行程出師有名，旅客即使對安排不滿亦投訴無門。換句話講，只要有同意書就等於攞咗免死金牌，奸商梗係有恃無恐啦。
當然啦，一個巴掌拍唔響，唔理旅行社有咩蠱惑招數，都要有旅客肯落疊至得。好簡單，有啲購物團標榜二、三百元人民幣暢遊港澳四日三夜，係人都知有蠱惑，呢個世界邊有咁大隻蛤乸隨街跳吖，羊毛出在羊身上，旅行社唔係開善堂，佢哋要賺錢，只有靠購物抽佣，唔怪得劏客現象屢禁不止喇。
不過話又講番轉頭，大部分購物團由內地人一條龍包辦，經營旅行社係佢，開設購物店舖、提供酒店又係佢，內地當局加強監管責無旁貸，特別係堵塞旅遊法漏洞，嚴禁旅行社收低於成本嘅團費，同時規限旅行社宣傳手法，只有咁樣至可以從根本上解決問題。
話時話，購物團亂象叢生，國產官僚固然難辭其咎，港產官僚亦責無可卸。出團嘅內地旅行社就話管唔到啫，負責接待嘅香港旅行社管得着喇啩，港府究竟要拖到幾時至肯認認真真堵塞漏洞呢？好似放蛇打擊購物團咁吖，央視都試過好多次啦，港府只要照辦煮碗，拉人封艇話都冇咁易。仲有吖，購物團旅客被迫購物，閒閒哋講緊幾千蚊甚至幾萬蚊，當中貨不對辦有之，以次充好有之，係咪應該循《商品說明條例》追究責任呢？
咪話功夫茶唔提醒，今時今日中港矛盾咁尖銳，萬一因為強迫購物而觸發衝突，隨時火上加油。唔該兩地政府諗辦法拆掂佢，如果唔係，盞大家都冇癮嘅咋！