「一國兩制」聽得多，「一街兩制」大家聽過未呀？前者係由鄧伯伯發明，後者就係水務署嘅專利嘞。
嗱，水務署咪一直都話「海水沖廁涵蓋全港八成人口」嘅，查實根本唔係呢回事，只不過係玩數字遊戲咋，原來工商大廈並唔包括在內，全港咁多幢工商大廈都唔計，得出來嘅數字邊有說服力吖。港產官僚信佢一成，雙目失明，真係一啲冇講錯。
本報記者喺中環抽驗咗十六幢商業大廈沖廁水嘅鹽度，結果好得人驚，其中九幢商廈檢驗結果鹽度為零，即係話超過一半商廈齋用淡水沖廁，咁都得！水務署點解釋呢？佢哋話喎，呢啲商廈中有七幢因為唔喺海水供應網絡，冇海水供應，即係噏得就噏喇。
同一條街嘅商廈，有啲有海水供應，有啲就冇，鹹淡交集，連沖廁水都搞出「一街兩制」，水務署果然創意爆燈。所謂海水沖廁「涵蓋八成人口」即係呃人啦，不過署方仲死撐，話統計數字唔係按工作環境，而係按海水供應網絡範圍同人口分布計算喎。官字兩個口，點到你唔服。
港府成日宣傳食水寶貴要珍惜，但係最應該惜水嘅水務署居然帶頭嘥水，對大量商廈用淡水沖廁聽之任之，諷刺之極。有學者話，雖然鹹淡交集情況有多種原因，但點講都好，水務署有責任提高供水能力，擴大海水供應網，令更多商廈有海水沖廁。立法會議員更炮轟，水務署用「八成人口」講法宣傳海水沖廁政策成功，根本係語言偽術，誤導市民。
話時話，水務署對浪費食水闊佬懶理，關人個關，早就唔係新聞嘞。幾乎日日爆水管浪費食水呢一筆唔講，有法不執同樣不負責任，舊年署方對非法以淡水沖廁嘅監控數字，原來得十一宗咁大把，罰款由三千至兩萬幾元不等，有阻嚇力至奇。違法用水懶執法，水務署又點會花心思擴大海水供應網絡吖。
仲有吖，香港自詡國際大都會，仲有唔少未改用鹹水沖廁嘅「環保死角」，譬如南區、屯門、元朗、西貢部分地區同離島等，人數多達一百三十萬。之前有統計顯示，由於港府一直唔肯改變現狀，接駁鹹水管沖廁，每年浪費嘅食水超過八千二百萬立方米，罪過罪過。
一句講晒，水務署淪為嘥水署，點止係失職，簡直就係同環保為敵。呢，早排有個巴勒斯坦記者用「淋瓦礫」代替冰水，接受「冰桶挑戰」，因為食水資源太珍貴，功夫茶建議照辦煮碗，用瓦礫淋醒呢班港產官僚，等佢哋親身體驗吓，水源枯竭，香港乾塘嘅滋味。