中秋佳節冇水游 皆因官僚太水皮

雖然已係秋天,但依然酷熱難當,想消暑咯喎,梗係呼朋喚友碧波暢泳一番喇。不過咁,近排不少泳客暢泳不成反而谷氣,事關救生員隔三差五就罷工,一罷工就搞到泳池及泳灘被迫關閉,大熱天時想游水都咁阻滯,唔谷氣就假!

話口未完,救生員又罷工嘞。港九拯溺員工會係咁講嘅,為咗表達對人手不足嘅不滿,決定喺中秋節翌日發起罷工,預料有數百名救生員參加,十多個泳池及泳灘受影響。發言人仲批評,當局遲遲冇設立救生員職系,改善待遇,導致缺乏新人入行,令接班出現問題,最終只會危及市民生命安全,所以罷工係迫於無奈咁話。

嗱,面對救生員再次罷工,做慣縮頭烏龜嘅康文署今次終於蒲頭嘞,可惜雙方開會雞同鴨講,點都傾唔埋欄。工會話喎,署方始終冇就增加人手及設立職系提出時間表及路線圖,好似「遊花園咁」,根本冇誠意解決問題。而康文署就另有說法,聲稱已調整泳灘季節性救生員嘅人工,仲話明年泳季會增加人手,不過始終唔肯將救生員轉為獨立職系,認為呢個要求冇理據喎,結果梗係一拍兩散啦。

公說公有理,婆說婆有理,雙方各持己見拗餐飽,市民就慘成磨心。話時話,近年救生員罷工已成常態,郁吓就集體請病假,郁吓就野貓式罷工,每次都搞到不少泳客乘興而來,敗興而返。上個月之嘛,先有三百多名救生員罷工,搞到五個泳池及兩個泳灘關閉,事隔一個月又嚟料,真係不勝其煩,就算原本同情救生員嘅市民,都好難同情落去喇。

講番今次罷工,中秋節翌日係公眾假期,泳池及泳灘例牌人頭湧湧,一旦關閉冇得游水,即係剝奪市民假日娛樂啫。再講吖,救生員唔止係一份工,仲關乎公眾利益,動輒攞市民做談判籌碼,點都講唔通啦。正如有人話齋,如果警察、消防員、醫生、護士個個有樣學樣,人人以自己利益為優先,咁咪世界大亂?

不過咁,救生員郁啲罷工固然要不得,康文署管理不善更加罪無可恕。正如工會吐苦水,話佢哋提出訴求已經十年,康文署一直闊佬懶理,迫使佢哋將行動不斷升級。而每次罷工,康文署都冇制訂任何應變方案,淨係識關閉泳池及泳灘,同斬腳趾避沙蟲根本冇分別。咁你話嘞,康文署辦事苟且,敷衍塞責,係咪工潮嘅罪魁禍首吖?

有人話一滴水可以反映世界,功夫茶就話從一個小小嘅泳池,就見到港府施政幾咁無能,官僚幾咁水皮。當局連解決救生員工潮都搞唔掂,怨聲載道冇乜嘢出奇吖!