聽日就係中秋佳節，功夫茶提提大家，今年食月餅要特別小心，否則一個唔好彩，分分鐘病從口入，咁就大吉利是喇！
唔係靠嚇。台灣坑渠油風波愈鬧愈大，當地已有二百三十幾間食品企業中招，幾百噸問題食油仲未收回，而香港亦受到池魚之殃，全面淪陷。食物及衞生局局長高永文證實，本港最少有二百幾間企業可能同涉事供應商有交易，其中七十間證實曾使用問題食油，當中包括美心等大型連鎖集團。而對於有月餅被指懷疑用咗坑渠油，高永文係咁講嘅，暫時冇發現月餅有問題，但唔能夠保證完全冇事喎。嗱，連高官都唔敢擔保月餅冇事，問你怕未。
最得人驚嘅係，到底有幾多坑渠油流入市面，港府一無所知，淨係強調問題食油涉及層面廣，大量原材料分銷到其他地方製作，又話台灣當局未能提供完整清單，亦唔知幾時有，市民如果對購買嘅台灣食品有懷疑，應該停止食用喎。喂，咁即係叫市民各安天命、自求多福嘅啫！
係人都知，本港食品主要依賴進口，而台灣同大陸作為主要來源地，黑心食品氾濫成災，香港好難獨善其身。正因為咁，更加要加強把關，嚴防死守，特別係建立食品供應鏈追蹤制度，更加係重中之重。嗱，英國、法國、德國等歐美國家近年對食品流通至銷售嘅各個環節，都建立咗嚴格嘅監管機制，大至農產品生產者資料，小至農藥同肥料嘅使用次數，全部有案可查，以便日後出事都知道循邊個環節追蹤。就連台灣當局都識得亡羊補牢，日前宣布建立食品來源流向追蹤機制，反觀港府仍然漫不經心，平時唔燒香，臨急抱佛腳，次次都搞到好似倒瀉籮蟹，七國咁亂。
所以話啫，港產官僚胡混度日，後知後覺，認真累人不淺。近年食品安全事件無日無之，蘇丹紅蛋、孔雀石綠魚、三聚氰胺奶、農藥蔬菜……五花八門，無奇不有。當局監管不力，搞到問題食品如入無人之境都算嘞，最離譜係早排麥當勞爆發過期肉醜聞，食安中心竟然好似代言人咁，主動配合對方隱瞞，宣布本港冇相關進口記錄，點知好快就被人踢爆，搞到滿城風雨。
總而言之，民以食為天，食以安為先。今時今日香港政治紛亂，經濟低迷，民生凋敝，市民冇咩望，只係望有安全食品啫，如果連咁低微嘅願望都落空，咁就真係可悲喇！