香港教育政策不嬲得個亂字，五時花，六時變，令人無所適從。屋漏偏逢連夜雨，家陣仲要加埋跨境學童大軍壓境，學額供不應求，點會唔係亂上加亂吖。正如「東方報業民意調查」顯示，大部分受訪者批評當局只知頭痛醫頭，腳痛醫腳，令跨境學童亂象雪上加霜。
呢嗱，就講今個學期開學日吖，簡直七國咁亂。今個學年有成四千名跨境學童來港升讀小一，教育局特登推出專屬校網，諗住將跨境學童分流，唔使一味局限喺北區，初衷係好嘅，可惜當局閉門造車，根本冇考慮實際情況，結果搞到跨境學童返學長途跋涉，仲引發口岸交通大混亂，有學童排錯隊，有學童上錯車，保母仲要周圍尋人，十足十走難咁款。「東方報業民意調查」顯示，四成三受訪者認為雙非童太多，邊境應接不暇；兩成六直斥政策敷衍，配套不足；兩成四批評當局亂點鴛鴦。
咁仲唔止，根據《各小一學校網小學名冊》顯示，明年全港官津小學共提供約四萬八千個小一學額，比今個學年微增二百五十五個咁大把，但升讀小一嘅學童人數多達五萬九千人，比今年仲多二千人，連同跨境學童，人數更達六萬三千人添。有數得計，學額足足欠成萬幾個，你話點算好吖！更大鑊嘅係，學額不足嘅情況由北區蔓延全港，重災區港島東欠成一千五百五十個學額，西貢區、油尖旺、中西區、觀塘區亦分別欠逾千個，問你怕未。
冰凍三尺，非一日之寒。搞到今時今日倒瀉籮蟹，根本係港府胡混度日所致。一直以來，當局對於有幾多雙非兒童回流就學一味靠估，欠缺全盤規劃，唔出事至奇吖。正如上述民調話齋，三成四受訪者炮轟當局對雙非童問題後知後覺，得過且過；三成一直斥頭痛醫頭，腳痛醫腳；兩成七批評當局一直漫不經心。話時話，當局平時唔燒香，臨急抱佛腳，一時搞加班，一時搞借位，一時又話推出「短命學校」應急，完全係煮到埋嚟先食咁款，搞到學生、家長同學校都疲於奔命，簡直靠害。
講到底，一日都係前朝貪曾政府累事。如果唔係貪曾好大喜功，大搞乜鬼教育及醫療產業，對雙非中門大開，家陣又點會咁閉翳吖。話貪曾係始作俑者，累人累物，一啲都唔過分。咁講啦，往者不可諫，來者猶可追，前朝政府留下嘅爛攤子，現屆政府有責任搞番掂佢，唔該教育局局長吳克儉亡羊補牢，快啲諗計，如果唔係，跨境學童「大躍進」，隨時搞成大災難都似。