個人遊對香港利大定弊多，就好似有雞先定有蛋先，係個見仁見智嘅問題。不過咁，隨着近年個人遊消費模式改變，零售業後勁不繼，商舖業主仲要逆市加租，搞到吉舖處處，咁就肯定係殺雞取卵。正如「東方報業民意調查」顯示，大部分受訪者批評商舖業主飛擒大咬，零售業雪上加霜，遲早一鑊熟嘅咋。
嗱，講多無謂，睇數字最實際。統計處公布七月份零售總額，按年下跌百分之三點一，已經係連續六個月錄得跌幅，問你怕未。正如零售業界話齋，內地反腐敗，旅客改變消費模式，加上「驅蝗」行動此起彼伏，嚇怕唔少旅客，零售業自然首當其衝。
照道理，零售市道轉差，商舖租金應該下調至係，點知商舖租金不跌反升，有啲業主寧願丟空舖位，都要企硬加租，問你服未。好似新界北區咁，不嬲係內地旅客及水貨客搜購日用品嘅熱門地點，超市、藥房、化妝品店其門如市，導致租金不斷飆升，不少業主頭腦發熱，租金一加就係一倍甚至九倍，搞到好多商戶頂唔順結業，家陣市區黃金地段吉舖處處，吉舖潮仲蔓延到上水同元朗區添。咁搞落去，遲早大家都冇運行嘅咋。
業主唔理三七二十一，加租大過天，租客叫苦連天，市民又點睇呢？「東方報業民意調查」顯示，四成九受訪者批評業主瘋狂加租等同殺雞取卵；兩成四指違反市場定律，不利經濟；兩成二認為拖垮整個租務市場。對於零售業走下坡，仍要面對業主大幅加租，三成九受訪者認為經營更加困難；三成八直指捱唔住，恐現裁員結業潮；一成九擔心吉舖情況蔓延。
無錯嘞，水能載舟，亦能覆舟，個人遊帶動香港經濟嘅同時，造成商舖單一化，客源單一化，將所有雞蛋放入同一個籃，點會有好結果吖。仲有呀，中港矛盾愈演愈烈，已經到咗水溝油嘅地步，港府早前放風話會檢討個人遊政策，本來係應有之義，問題係，零售業已經進入寒冬，仲要收緊個人遊嘅話，只會屋漏偏逢連夜雨嘅咋。有學者估計，削減個人遊數目會造成連鎖效應，令GDP損失近四百億元，你話係咪大鑊吖？
講到尾，當局不思進取，一味食老本，咁多年來都冇提升過旅遊設施，增加接待能力，先至係問題所在。有人早就提出，當局只要開發邊境購物城，就可以將旅客同市民分流，減少摩擦，可惜港府根本聽唔入耳，無所作為，導致中港矛盾惡化。正所謂，此處不留人，自有留人處，內地旅客大把選擇，到時財神爺蟬過別枝，港府後悔已經太遲咯！