中港交流愈嚟愈密切，兩地貨物來往更加係川流不息，對於貨車司機嚟講，爭取時間踩多兩轉最緊要。可惜吖，國產官僚成日阿茂整餅，冇嗰樣整嗰樣，不斷推出擾民措施，搞到司機無所適從，怨聲載道。
呢，話口未完又嚟啦。話說中港貨車司機以前經深圳灣口岸過關，淨係需要提供姓名同貨櫃車編號，十分鐘搞掂。點知內地當局今個月初突然要求司機提供埋櫃號、貨架重量、海關編號以至司機中文名普通話拼音等資料，由於資料繁多，搞到司機頭都大埋，經常等成粒鐘都未過到關。咁都未算最離譜，有司機試過未能提供相關資料，貨車被扣留超過一星期，你話點樣搵食吖？業界人士批評當局失驚無神行新例，事前又冇宣傳，搞到失晒預算。
即係咁，司機多勞多得，手停口停，家陣過關費時失事，唔嬲就假。奇就奇在次次出事都要自己同內地當局投訴，而港府就關人個關，闊佬懶理，問你服未。其實，如果兩地部門平時多啲溝通，大可及早向司機宣傳新通關措施，等佢哋早作準備，就唔使搞到措手不及，七國咁亂啦。
仲有呀，新例實施至今差唔多成個月，港府竟然懵盛盛，完全冇向內地反映業界苦況。咪話功夫茶唔提醒呀，新措施就快擴展至皇崗同文錦渡口岸，再咁落去，盞亂上加亂嘅咋。
講到底，求人不如求己，司機早就深有體會嘅喇。內地海關之前為打擊車輛隨意申報運載重量，嚴格執行電子磅秤重查車制度，結果搞到各口岸大塞車，港府一樣係袖手旁觀，事前協調不力，事後推諉卸責。最離譜係香港海關收到業界求助後，居然將個波踢畀內地當局，話干涉唔到對方政策，愛莫能助喎，結果咪又係靠業界自己同內地海關拆掂。
可能有人會話，國產官僚處事僵化，只顧自己方便，不理他人死活，先會搞成咁。查實港產官僚都唔好得去邊，好似落馬洲管制站咁吖，每晚凌晨時分係貨車返港高峰期，點知海關按本子辦事，淨係開一兩個通道，搞到晚晚都大排長龍，業界多次投訴，當局睬你都傻，激到司機怨氣大爆發，發動幾百部車罷駛，當局至死死地氣加開通道，簡直係唔見棺材唔流淚！
今時今日，中港矛盾愈演愈烈，國產官僚仲喺度添煩添亂，唔通真係要逼到司機佔領管制站，當局至識驚？