現代交通運輸，鐵路係必不可少嘅選擇，尤其好似香港呢種地少人多、道路擠塞嘅城市，發展鐵路運輸更加係大勢所趨。所以呢，港府尋日公布未來鐵路發展策略研究報告，建議興建多條新鐵路，反對聲音唔算好大，市民最擔心嘅反而係當局規劃失當，監管不力，如果再次爆出延誤及超支醜聞，咁就弄巧反拙喇。
係咁嘅，港府就未來鐵路發展進行公眾諮詢，最後喺十個方案中採納七個方案，計劃興建多條新鐵路線，包括北環線、東涌西延線、屯門南延線、東九龍線、南港島線西段、北港島線，同埋喺東鐵落馬洲支線加設古洞站、喺西鐵線加建洪水橋站，總共七個鐵路項目，預算開支一千一百億元，都算大手筆咯。至於另外三個方案，包括港深西部快速軌道、屯門至荃灣鐵路及小西灣線，就因為建造成本太高而放棄。港府話喎，到二○三一年鐵路總長度將增至三百公里，七個新項目每年可以帶來三十至四十億元直接經濟效益。
嗱，望就係咁望，但事實係點，仲要睇過至知。前朝貪曾政府好大喜功，推出所謂十大基建，結果問題多多，尾大不掉，淨係港鐵負責興建嘅五條新支線咋，全部延誤不特止，成本更加係節節上升，總共超支數以百億元計，前車之覆，後車之鑑吖。
所以話，冇咁大個頭唔好戴咁大頂帽，當局放棄三條鐵路線，可能就係吸取咗前朝教訓啩。其中一條被放棄嘅港深西部快速軌道，被貪曾政府列為十大基建之一，當時估計成本只不過係幾百億元，家陣照舊年價格估計已超過一千一百五十億元，加上要建造海底鐵路隧道，工程複雜，如果夾硬上馬，隨時成為高鐵翻版嘅咋。你話嘞，貪曾係咪靠害吖！
講開又講，依家落實嘅七個鐵路項目，話就話估計一千一百億元可以搞掂，最怕當局拖拖拉拉，議而不決，最後又以嚴重超支收場。本報早前計過數，前朝政府嘅十大基建總共超支逾一千億元，現屆政府會唔會重蹈覆轍，真係好難講。大家都知，港產官僚一向食嘢唔做嘢，做嘢打爛嘢，就算七個新鐵路項目將唔會同時開工，防止「消化不良」，但如果當局監管不力，放任港鐵自把自為，加上其他未知嘅因素，冇人敢擔保唔會出事。尤其係社會愈來愈政治化，行政立法關係惡劣，好多基建遇到阻力，當局寸步難行，鐵路發展大計可唔可以順利落實，真係令人懷疑。
正如古人話齋，築室道謀，三年無成。香港風雨不停，港府蹉跎歲月，社會陷於空轉，受阻嘅又點止鐵路發展大計吖！