每次打風過後，香港例牌滿目瘡痍，七國咁亂，大家早已見怪不怪，其實打風唔止會帶來破壞，仲可能為不法之徒大開方便之門，大家又知唔知吖？
唔係講笑。早排颱風「海鷗」襲港，竟然吹毀警方喺沙頭角海域設立、為打擊走私而設嘅「海上屏障」。所謂海上屏障，係水警用一艘無動力躉船同浮泡組成嘅防線，全長約一點四公里，一○年啟用至今，將唔少海上非法活動拒之門外。可惜吖，一場颱風將躉船纜索吹斷，躉船更加隨風漂流到兩公里外，好彩附近村長醒目，巡邏時發現報警，否則中門大開，隨時益咗走私客。
嗱，反走私防線被颱風攻陷，唔係講玩。可能警方知驚，拿拿臨補鑊，一邊採取臨時措施固定躉船，一邊增派水警輪加強巡邏，防止走私客博懵。咁又係呀，沙頭角海域出名係走私黑點，早前之嘛，警方同海關破獲一個走私電子產品集團，檢獲大量手機、數碼相機同電子零件，價值七百萬元，村民亦周不時發現有走私快艇出沒，唔駐重兵防守點得。
即係咁，亡羊補牢的確有必要，之但係小修小補始終解決唔到問題。正如有地區人士話齋，海上屏障設立至今，已經多次被颱風吹毀，希望警方同其他部門諗辦法加固防線咁話。
講到呢度，有必要岔開一筆。查實當局早前已向立法會財委會申請撥款，準備購買一艘動力躉船取代現有嘅躉船，可惜財委會上個財政年度未能處理，搞到買船計劃遙遙無期。鬼咩，政客不務正業，郁吓就拉布，郁吓就流會，乜嘢都做唔成，莫講買新躉船，好多更重要嘅民生議題都受到阻撓。所以話啫，政客累人累物，真係一啲都冇講錯。
好嘞，言歸正傳，講到弱不禁風，海上屏障被吹毀只係冰山一角嘅咋。好似舊年至啟用嘅將軍澳南海濱長廊咁吖，原來係不堪一擊嘅豆腐渣工程，畀「海鷗」吹到欄杆倒塌，路面損毀，石壆移位，都咪話唔兒戲。唔理係颱風又好，黑雨都好，總而言之，每次天災過後，市面都係滿目瘡痍，直情好似打完仗咁，難為香港仲以國際都會自居，其實似第三世界就差唔多。
都係古人講得啱，弗備難，難必至。咪話功夫茶唔提醒呀，家陣風季仲未結束，唔該港產官僚打醒十二分精神，做足預防措施，如果唔係，等到爆大鑊至嚟補救就太遲嘞！