俗語話，舉頭三尺有神明，家陣應該改成舉頭三尺有招牌至啱。唔信嘅話，出街睇吓，就會發現梗有一個喺頭頂，萬一跌咗落嚟，後果不堪設想。可能屋宇署都知衰啩，去年推出自願申報違例招牌計劃補鑊，點知反應差強人意。正如「東方報業民意調查」大部分受訪市民話齋，當局眼高手低，執法不力，導致計劃形同虛設，市民生命安全點會有保障吖。
嗱，目前全港違例招牌最少有十二萬個，唔少仲係日久失修，甩皮甩骨嘅添。好似早前八號風球「海鷗」襲港咁吖，有巨型招牌被風吹到搖搖欲墜，睇見都牙煙。好嘞，屋宇署去年九月終於推出自願申報計劃亡羊補牢，只要招牌持有人提交證明書證明招牌安全，即使未經審批嘅招牌都可以保留。呢個計劃原意係唔錯嘅，可惜港產官僚閉門造車，一廂情願，正如前線測量員話齋，自願申報等如自投羅網，犯法嘅人又點會自己踢爆自己咁蠢。再講吖，當局宣傳不足，好多商戶連聽都未聽過相關計劃，點會有成效喎。
事實擺在眼前，截至今年八月底，屋宇署只係收到七十二份申請，佔全港招牌零點零六個巴仙，而且只有十五份獲確認，實際成效接近零，問你服未。市民眼睛係雪亮嘅，接受「東方報業民意調查」嘅受訪者之中，四成五直斥有關計劃非強制性，形同虛設；兩成七批評要違例者自首，難有成效；兩成四認為宣傳不足，少人知。冇錯嘞，自願申報計劃先天不足，後天失調，唔爛尾收場至奇喇。
即係咁，有關計劃成效不彰都算嘞，最抵死嘅係，屋宇署連日常執法都放軟手腳，今年首七個月發出嘅違例招牌清拆令及通知書，只有七十六份咁大把，比去年同期大減逾四成。你話嘞，屋宇署懶得就懶，蛇得就蛇，係咪靠害吖？難怪三成五受訪者批評屋宇署無配合計劃加強執法；三成四指摘取締違例招牌得個講字；兩成七直斥處理違例招牌歎慢板，可見公道自在人心。
講真吖，危險招牌遍地開花，埋下大量都市炸彈，唔係講玩。大家應該仲記得，○八年灣仔一間餐廳嘅大招牌突然倒塌，壓死一名女途人；去年底旺角又有個巨型招牌吊吊揈，搞到彌敦道嘅交通癱瘓六小時。最弊傢伙嘅係，家陣唔止違例招牌愈積愈多，建築物僭建問題亦愈演愈烈，容乜易塌完招牌又冧樓。所以話，屋宇署有法不依，執法不嚴，再咁落去，「戴鋼盔行騎樓底」呢句港人口頭禪，怕且好快會喺現實中出現咯。