古人話，謹慎乃保家之本。真係冇講錯，呢個世界疫症不斷，病毒肆虐，一時沙士，一時禽流感，一時伊波拉，一波接一波，如果當局把關不力，防疫鬆懈，隨時招災惹禍。
嗱，先唔講其他，本港防疫措施漏洞百出，尤其係對外傭幾乎零設防，就係一個極大嘅危機。根據僱傭條例，外傭來港工作前話就話要驗身，而且需要僱傭雙方同意驗身報告至會獲發工作證，但所謂嘅驗身，居然唔包括痲疹及德國痲疹等傳染病嘅抗體檢查，即係話港府並無規定外傭必須注射防疫針，你話係咪靠害吖？
咪以為唔打防疫針係小事，就講痲疹吖，由於周邊國家大爆發，香港亦受到池魚之殃，衞生防護中心今年頭八個月已接獲四十七宗感染個案，比去年全年總數仲要多兩成，其中超過一成患者係外傭，試過有外傭將痲疹傳染畀僱主家人添。除咗痲疹之外，其他傳染病亦曾經喺外傭圈子爆發，有位印傭感染德國痲疹後出席教會聚會，結果導致另外十一名外傭齊齊感染，可能就係因為佢哋冇接種疫苗。正如醫生話齋，痲疹同德國痲疹對嬰兒禍害極大，嚴重嘅可能致命，孕婦感染德國痲疹甚至可能誕下畸胎添，問你怕未！
現時香港大約有三十二萬名外傭，多數來自東南亞國家，當地衞生條件差，成為傳染病高發地，加上好多居民從未注射過疫苗，呢啲零防疫外傭融入香港家庭，都咪話唔得人驚。好明顯，香港針對外傭嘅防疫措施遠遠落後於台灣及新加坡，台灣幾年前已規定所有外勞必須接種痲疹及德國痲疹疫苗，並需於抵台三日內以及工作滿六、十八、三十個月後接受健康檢查；而新加坡仲要求外傭每半年接受一次包括傳染病嘅身體檢查添。
講到呢度，大家應該知道點解香港經常受到疫症侵襲，港府大開中門，完全不設防，疫症唔乘虛而入至奇喇。呢，最近西非爆發伊波拉，至今已錄得超過四千宗感染個案，逾二千人死亡，港府話就話採取防疫措施，但有政黨調查發現，三成受訪市民認為當局發放嘅疫症資訊不足，九成更認為應該對來自疫區嘅旅客實施健康申報。
冇錯嘞，防疫寧緊勿鬆，當年沙士搞到香港雞毛鴨血，幾乎萬劫不復，咪就係因為港產官僚反應遲鈍，後知後覺囉。咪話功夫茶唔提醒，香港係全球交通樞紐之一，八方來客，人流不斷，外國爆發疫症，香港都幾難獨善其身，家陣伊波拉病毒來勢洶洶，加上外傭零防疫，如果港府再唔堵塞漏洞，遲早爆大鑊嘅咋！