俗語話，山水有相逢，真係一啲都冇講錯。台灣坑渠油風波愈揭愈臭，大家眾口一詞指摘台灣禍及香港，點知原來香港先至係坑渠油嘅源頭，港台有油同食，有禍同當，問你服未。
嗱，坑渠油事件發展至今，唔止夠晒離奇，而且夠晒峰迴路轉。涉事嘅台灣強冠一直向香港金寶運有限公司攞貨，而貨源則來自元朗寶源油脂公司。寶源老闆亦直認不諱，出產嘅豬油根本「唔食得」，至於下游企業會唔會用於其他用途，佢就唔理得咁多喎。最得人驚嘅係，台灣強冠員工聲稱從香港進口劣質油至少十三年，台灣當局亦指單係今年上半年從香港進口嘅未食用豬油，佔總進口量九成，問你驚未？今次人證物證俱在，香港成為劣質油輸出地，簡直水洗都唔清！
仲有吖，台灣強冠同香港金寶運嘅董事原來有千絲萬縷嘅關係，兩間公司你中有我，我中有你，分分鐘係由同一班人經營。食安中心話喎，已查明寶源出產嘅豬油只作飼料用途，但金寶運出口到台灣強冠嘅豬油則寫明適宜人類食用，覺得事不尋常，會循刑事方向調查云云。事實證明，天下烏鴉一般黑，黑心食品並非內地獨有，中國人嘅劣根性亦無地域之分，兩岸三地嘅奸商唯利是圖，根本係一擔擔嘅咋。
好嘞，今次事件愈演愈烈，市民最關心嘅係邊啲企業用咗坑渠油呢？可惜吖，食安中心一如既往，十問九唔知，淨係一味叫企業自律交代喎。正如餐飲業人士話齋，本港只有大約廿間食油進口公司，從源頭監控其實好容易，偏偏當局本末倒置，係都要從分銷商下游向上追查，結果梗係事倍功半，費時失事啦。
最離譜嘅係，食安中心每次都係後知後覺，今次亦唔例外，最慘仲係訊息混亂，令人無所適從。試諗吓，如果唔係台灣當局揭發事件，食安中心依家仲係矇查查嘅咋，你話港產官僚靠唔靠得住吖？仲有呀，坑渠油牽連極廣，搞到人心惶惶，但食環署署長及食安專員竟然統統潛水，遲遲未現身解畫。上次麥當勞過期肉事件係咁，今次坑渠油事件又係咁，簡直豈有此理。
事實擺在眼前，工業用豬油竟可當成食用油出售，仲要咁多年都冇人知，證明食物安全漏洞多多，食安中心形同虛設。正如立法會議員話齋，現行法例未能堵塞漏洞，罰則又輕，建議設立食油進口商發牌制度，並為回收廢食油設立追蹤機制。嗱，事在人為，辦法就提咗出嚟嘞，食安官僚幾時至肯亡羊補牢吖！