「大眾踩單車郊野上，良朋共享身心舒暢」，懷舊金曲令人回味，可惜時移世易，此情不再，家陣郊野公園陷阱處處，已經冇身心舒暢呢支歌仔唱咯。
本來呢，天高氣爽係一家大細親近大自然嘅好時機，環境清幽嘅郊野公園更加係第一選擇，不過咁，現實中嘅郊野公園已經唔再係淨土，而係車水馬龍、險象環生。好似大欖郊野公園咁，其中石崗雷公田一段路，因為太多人駕車去參觀一間奶牛場，附近泊位又經常爆滿，唔少車主索性將旁邊一條禁路當「停車場」。
本報記者去現場睇過，唔夠一粒鐘已經有超過十架私家車「犯禁」長驅直入，全部唔見展示許可證，而禁路出入口因為車輛太多，足足塞咗十五分鐘。大吉利是講句，萬一禁路內發生事故，救護車被困車龍，郁不得其正，後果不堪設想。仲有吖，喺同屬大欖郊野公園嘅河背水塘，其中一段車輛禁路亦係越野單車熱點，有車輛同正衝落山嘅單車隊迎頭相遇，隨時發生意外，搞出人命，睇見都牙煙。
喂，話明係禁路，點可以冇規冇矩長驅直入。根據《郊野公園及特別地區規例》，除非獲漁護署簽發嘅許可證，並展示喺擋風玻璃上，任何人唔可以揸車進入郊野公園。可惜吖，法例形同虛設，禁路名存實亡，唔講話人車爭路搞到危機四伏，淨係汽車出入增加，造成更多人流、廢氣、垃圾及噪音，已經搞到郊野公園烏煙瘴氣。
禁路不禁，有法例等於冇法例，講到底都係因為漁護署有法不執，執法不力。嗱，署方話就話喺荃錦坳同大埔滘等禁路出入口設立咗人手檢查站，禁止無許可證車輛出入，其實得個睇字，漁護署人員連影都唔見，得塊禁止進入路牌戙喺度，稻草人都會隨風郁下喇，呢個路牌連稻草人都不如，點可能有阻嚇作用吖。
難為漁護署仲死撐，話舊年一共檢控咗一百七十六宗違規進入禁路喎。其實全港有咁多郊野公園，禁路亦唔少，一年三百六十五日，當局平均每兩日至檢控一宗，咁就叫執法？慳啲喇，淨係大欖郊野公園咋，一日違禁車輛就可能超過呢個數喇。
都係嗰句，官僚靠得住，豬乸會上樹。前幾個月之嘛，因為連場暴雨，部分遠足徑隱藏山泥傾瀉同冧樹危機，漁護署既無豎立臨時圍欄，又無豎立警告標誌，簡直靠害。計功夫茶話齋，郊野公園危機四伏，漁護署不如改名做「陷阱署」吖，笨！