正所謂，沒有最醜，只有更醜。公立醫療亂象叢生，醜聞多多，早就唔係新聞，估唔到家陣居然發展到將新簇簇嘅醫療物資當垃圾隨街擺，問你服未！
呢，本報踢爆伊利沙伯醫院任由六百箱啱啱出倉嘅醫療物資，無遮無掩放喺露天地方超過一星期，當中包括嬰兒尿布、病人服同床單等，仲要同污糟被單及衣物撈埋一堆。更得人驚嘅係，呢批物資經過日曬雨淋，加上早前颱風「海鷗」摧殘，殘破不堪，甚至有包裝紙箱霉爛入水，搞到新貨變舊貨，你話係咪暴殄天物吖？
唔使問阿貴，今次事件擺明係伊院管理混亂，物流同清洗部門之間零溝通，吟詩都吟唔甩。可惜吖，醫療官僚一個二個姓賴，院方發言人話喎，呢批物資係等候送往清洗嘅病人被服，由於之前掛八號波，運送出現延誤。院方仲話，為確保所有病人有乾淨被服用，就算係新嘅都要按既定程序先進行清洗。言下之意，即係話呢批物資擺喺街邊日曬雨淋冇問題啦。
呢啲咪叫狡辯囉。正如有伊院員工話齋，既然一早知道會打風，即使唔將物資移入室內，起碼都應該加層膠布作保護，又或者用繩索綁緊以抵禦強風吖。冇錯嘞，如果呢批物資係醫院管理層自己嘅，佢哋會唔會就咁擺喺街邊吖？所以話啫，院方連舉手之勞都唔肯做，講得好聽啲係溝通有問題，講得唔好聽直頭係冇心冇肺。
講開又講，公立醫院沉香當爛柴，物資當垃圾，其實早有前科。好似曾經爆出見死不救醜聞嘅明愛醫院咁吖，就曾經被揭發將超過二十噸未開封、由社區人士捐贈嘅衣服、玩具同食具等當垃圾棄置，白白浪費善長愛心。
當然喇，呢啲只係公營醫療亂象叢生嘅冰山一角咋。打錯針、斷錯症、輸錯血、開錯刀、畀錯藥……五花八門，無奇不有，可想而知醫管局管理幾咁混亂。唉，冇法子喇，醫管局一味肥上瘦下，坐視前線醫護人手不斷流失，搞到七個蓋要冚十個煲，唔出事至奇喇。
曾幾何時，香港醫療水平喺亞洲首屈一指，港人引以為傲，可惜時移勢易，今時今日冇呢支歌仔唱咯。最近有調查發現香港醫療系統效率嘅表現，首次畀老對手新加坡爬頭，講起真係丟架。咪話功夫茶唔提醒，醫僚官僚再唔醒醒定定，做好份工，遲早畀市民當垃圾掟出街嘅咋！