孔夫子教落，工欲善其事，必先利其器。道理好簡單，做乜嘢事都好，如果準備工夫唔足，要嗰樣冇嗰樣，一定烏龍百出，撞板多過食飯，好似啟德郵輪碼頭咁，簡直失禮旅客。
呢個斥資逾八十億元興建嘅郵輪碼頭，本來可以成為香港新地標，揚名國際，可惜由於配套設施天殘地缺，加上管理混亂，導致醜聞多多，除咗曾被踢爆老鼠橫行、天花板漏水等，更失禮嘅係交通工具不足，每次郵輪停泊都搞到七國咁亂，旅客怨聲載道。今年四月初之嘛，世界最大郵輪之一嘅瑪麗皇后二號載住二千幾名旅客駕臨啟德郵輪碼頭，結果出現逾千名旅客打蛇餅等的士奇景，你話係咪醜怪吖？
咁都未算誇張吖，碼頭第二個泊位本月底啟用，到時將會首次有兩艘郵輪同時停泊，都唔知仲會亂成點。根據安排，將於月底同時停泊啟德郵輪碼頭嘅係藍寶石公主號及海洋航行者號，載客量分別係二千六百人及三千一百人，如果旅客齊齊出市區觀光，試問要幾多交通工具至可以應付呢？上次一艘郵輪二千幾名旅客已經打晒蛇餅，今次兩艘郵輪合共五千幾名旅客殺到，實在難以想像會發生乜嘢事，最怕到時又引起旅客鼓譟，令香港形象再次受損咋。
當局打算點樣應付呢？據講港府正與碼頭營辦商密密開會，提出多項所謂改善交通嘅新招，包括喺的士電台廣播及派人到附近加油站招攬的士到碼頭接客喎。不過咁，的士業界睇嚟就冇乜興趣喇，正如司機話齋，叫的士空車入去接客，又點會有吸引力吖。
有立法會議員計過數，就算五千幾名旅客全部乘搭穿梭巴士，以每架車載五十人計，最少需要一百架旅遊巴，一時之間去邊度搵咁多車呢？如果只有幾架旅遊巴來回接客，遇到早上交通擠塞，盞費時失事嘅咋。所以話，冇咁大個頭唔好戴咁大頂帽，碼頭未做好交通等配套，應付一艘郵輪已經烏龍百出，雙泊位啟用後更加不堪設想。
講起配套，真係得啖笑。啟德郵輪碼頭講咗十幾年至興建，而啟用超過一年後嘅今日仲係乜都冇，周圍更加係一片爛地，話就話碼頭裏面嘅商舖將會陸續開業，但平時人流稀疏，商舖可唔可以維持落去，真係令人懷疑。難為港府仲吹水唔抹嘴，揚言要將啟德發展成亞洲郵輪母港添。即係咁，香港唔係冇條件發展成郵輪母港，而係港產官僚眼高手低，做嘢拖拖拉拉，甩甩漏漏，就算碼頭再靚，都係嘥氣咋！