民以食為天，食以安為先。要食得安心，除咗必須確保食品安全，食肆環境安全同樣重要，如果唔係，萬一「去飲」遇到火燭，逃生無門，咁就大吉利是喇。
唔係講笑o架，近年舖租不斷飆升，唔少食肆被迫向高空發展，轉往商廈經營，搞到「食廈」遍地開花，蔚為奇觀。正所謂適者生存，食肆轉往商廈發展本來好正常，弊在港府監管失職，執法甩漏，導致「食廈」消防隱患處處，危機重重，隨時變成死亡陷阱。
好似佐敦一幢商廈咁，樓高十三層，食肆佔咗九層，平時門庭若市，食客雲集，幾乎水洩不通，連防煙門外嘅空位都擺埋枱做生意。更離譜嘅係，雖然管理處已經貼咗警示，但多處後樓梯一樣堆滿雜物，包括紙箱等易燃物品，一個唔好彩發生火警，隨時燒通頂，到時食客逃生無門，都唔知點算。
呢個只係冰山一角咋，旺角一幢二十層高嘅大廈，十一層係食肆，其餘樓層就有桌球室、遊戲機中心等，後樓梯同樣堆滿雜物，簡直烏煙瘴氣，除非唔出事，否則後果不堪設想。
全港有近萬間持牌食肆，愈來愈多轉往商業大廈經營，而當局嘅監管未能與時俱進，埋下極大危機。按照現時法例，每幢大廈嘅酒吧數目有限制，但食肆數目就冇規定，有人於是利用呢個漏洞，掛羊頭賣狗肉，先申請較容易獲批嘅食肆牌照，再取得酒牌，其實主要以賣酒牟利。
對於呢個咁明顯嘅漏洞，唔通當局一無所知？相關部門回應本報記者查詢時，竟然互扯貓尾，互相卸責。食環署話喎，批核食肆申請前會徵詢其他部門意見至發牌；而消防處更加輕描淡寫，聲稱會對申請者所示處所進行實地風險評估喎。嗱，立法會議員就講得啱嘞，食肆佔用走火通道做生意，屬於安全隱患，確保走火通道安全，消防處及食環署絕對責無旁貸。
講開又講，港產官僚有法不依，執法不嚴，早就見怪不怪，「食廈」危機只係冰山一角咋。審計署早前踢爆，消防處處理投訴及執法甩甩漏漏，烏龍百出，例如該處聲稱處理消防安全投訴百分百達標，原來係作大，部分投訴嚴重延誤，導致個案愈積愈多。消防處不務正業，敷衍塞責，唔怪得消防隱患多多，危機處處喇！
一句講晒，安全大過天，消防無小事。港產官僚再唔嚴格執法，加強巡查，杜絕隱患，唔通真係要見到棺材至流眼淚咩！